أميــــرة
26 June 2007
يللا ... حُســن الختــــــان
يستحق الكاتب والمؤلف المسرحي علي سالم - عن جدارة وإستحقاق - أن ينالَ جائزة الدولة التشجيعية والتقديرية ، المنطقية منها والعبثية .. وذلك لإكتشافه النظرية الأشهر والأكثر تطبيقاً في حياة البشرية ألا وهي
نظرية دراع مُرسي
تلك النظرية التي جاءت على لسان سعيد صالح - اللي هو مُرسي - في مسرحية مدرسة المشاغبين
حين يتحدث أحدهم باسم الرب الإله ... فإن عقول مُعظمنا تتراجع إلى الوراء لتُفسح المجال لأرواحِنا البريئة النقية، فهي الأبقى والأهم ... فالعقل ذاهب بلا ريب ، والجسد فانِ بلا أدنى شك
وبُناءً عليه .. فحين يتحدث أحدهم باسم الرب الإله يُصبح لزاماً على العقل أن يصمت ، وعلى الجسد الفاني أن ينزوي ويختبئ ، حاملاً معه ما يُسمى بخلايا المخ ... والأحبال الصوتية
وعلى هذا الـ ( أحدهم ) ألاّ ينسى تكرار إسم الرب الإله بين الحين والآخر
حتى لا ينتهز العقل الفرصة ... ويشاركنا الجلسة
من أسبوع لقيت عندي تعليق على تدوينة قديمة شوية من شاب صغير عنده عشرين سنة ، إسمه ابو زياد الفاتح .. ماقالش فاتح إيه بالظبط .. رُحت مدونته علشان أفهم ، لقيته مسميها ( الإسلام هو الحل ) وبرضه ماقالش حل إيه بالظبط
المهم .. الشاب أبو زياد كان عنده مهمة محددة، وهي تنبيهي لضرورة تغيير الصورة اللي في المدونة علشان خايف عليا من غضب ربنا
وبرغم سنه الصغير و العشم الشديد في أسلوب تعليقه الأول عندي - وغالباً الأخير لأني مش ناوية أشيل الصورة - أنا ماكنش عندي أي إعتراض على أي حاجة غير إنه إفترض - من نفسه - إني مسلمة
على أي أساس ؟؟؟ .... مش عارفة
حين يُصفق البعض إعجاباً بما يحدث في غزة .. ويصرخون فرحاً لسقوط صورة الراحل ياسر عرفات على الأرض تعود إلى ذاكرتي كلمات قديمة لهؤلاء المصفقين المبتهجين، قالوها وكتبوها وقتما كان عرفات على قيد الحياة
وأتساءل .. من أي مصدرِ يأتون بتلك الجرأة والإتكال على ضعف الذاكرة
لدي إصرار عجيب على أن المواقف لا تسقط بالتقادم .. تلقائياً
عليّا النعمة الراجل ده بيتكلم صح
أنا مش فاهم أي حاجة من اللي بيقوله
بس مادام قال دراع مُرسي .. يبقى بيتكلم صح
التحدث باسم الرب الإله .. يُعد من أقدم أساليب كسب العيش والتربُّح المشروع
بداية من فكرة القرابين والتضرع من أجل قبولها كوقود للنار المُقدسة .. مروراً بشعار ( إدفع كي تحصل على البركة ) وحتى أيامنا هذه
ومن البنوك الإسلامية إلى الهاتف الإسلامي إلى العلاج بالأعشاب إلى شرائط الدُعاة إلى الملصقات الدينية إلى مشايخ الفضائيات
إلى رجل أعمال يمتلك قناة فضائية دينية بجانب قنوات الأفلام والرياضة والطرب في نفس ذات الوقت
ياقلبي ... إياك أن تحزن
وعلى المُعلن ألاّ ينسى تكرار إسم الرب الإله بين الحين والآخر
حتى لا ينتهز عقل المستهلك الفرصة ... ويشاركنا الجلسة
خبر صغير في الصفحة الفنية بإحدى الجرائد اليومية
لم تتلق أياً من سهير البابلي أو سهير رمزي أو صابرين أية عروض لأعمال فنية مستقبلية حتى الآن
مما يعني عدم وجود فنانات محجبات في مسلسلات رمضان القادم
وبعد أن قامت الدنيا ولم تجلس حتى الآن إختلافاً وجدالاً حول تحريم الفن وعمل المرأة وخروجها من بيتها .. إلى آخره، أتوقع أن تُعلن إحداهن أن ما فعلته في رمضان الماضي كان مجرد وسوسة شيطان .. ولن تتكرر
التحدث باسم الرب الإله هو أقصر الطرق المؤدية إلى الهدف المنشود
فالحديث باسم الديمقراطية لم يأت بنتائج مرضية .. والحديث باسم الحرية يثير التحفظ ويسبب الشعور بعدم الراحة
أما شعارات الإشتراكية والقومية ومثيلاتهما ، فقد أثبتت فشلها الذريع على أرض الواقع
لم يبق إلا الشعار الديني .. أثبت نجاحه وجاذبيته ولا يزال يحقق أعلى الإيرادات
نقتِل ونسرق ونرتشي و نُدعّم ونُندّد ونُحرّم ونُحلل ونمنع ونمنح ونُبيح ونستبيح
باسم الدين
ولا مانع أبداً من الغناء باسم الدين
طالما أن المُغني لا ينسى بين الحين والآخر أن يذكر إسم الرب الإله .
حتي لا ينتهز عقل المستمع الفرصة
ويشاركنا الجلسة
...............
46 Comments:
حتى لا ينتهز العقل الفرصة
ويشــــــاركنا الجلســــــــة
مقولة اختزلت مضمون السطور والأمثلة كلها فى جمال ورشاقة ومنطقية مجردة
عادتك ولا حتشتريها؟؟؟
وللأسف يا عزيزتى
استمرار الحشو فى عقول الناس بالانتباه للآخرة فقط واعمل لآخرتك وعش لآخرتك واترك دنياك واهرب منها ولا تعرها قيمة ولا عمل
هو ما جعل الناس ترتمى فى أحضان من يتاجر باسم الدين
ليتيسر لها طريق جنة الرب فى الآخرة
الطريق الى جنة الرب الالة
العصا السحرية فى يد كل متاجر ليروج بها بضاعته
ولا مانع بخلطها بالمحظورات طالما ستقود الى الجنة
وكأن الدنيا دى بنت دزمة لا تستحق أن نعيشها ونستمتع بها أو نعمّر فيها كما أمرنا الخالق
وكم من المذابح ارتكبت باسمك أيها الرب الالة
وكم من العقول ذبحت باسمك أيها الرب الالة
وكم من المحارق اشتعلت باسمك أيها الرب الالة
وكم من الأرصدة البنكية نمت وترعرت باسمك أيها الرب الالة
===============
انجليزى دة يا مرســـــى؟؟؟؟
أنا قالوص ، وأنتي ؟..... قوصرة أم عَـلة ؟
This comment has been removed by the author.
السلام عليكم
رغم أن ما قلتيه صحيحا، وأنى أتفق معكى فيه .. وفى أن الدين أصبح شعارا، شعارا من يرفعه غالب دائما
فهو يتحدث باسم الرب الإله، كما تفضلتى، ونحن بالطبع عاطفيين .. متدينين .. ولو بالوراثة
ولكن ما أريد أن أقوله، وهو تفسير كلمة "رغم"، هو أنكل منا مازال مسئول، عن سلوكه وتصرفاته، أمام الرب الإله، والذى لم يأمرنا يوما بتغييب عقولنا
لذا فأنا فى المقابل، لا أدعم الكلمات التى تعبر عن التساهل وهجر الدين، وبالطبع تلك التى تدعم التطرف
وإنما الوسطية دائما
لذا فأنا، لا أحبز الهجوم على كل من فى الفضائيات، ولا أؤيد كذلك كل ما يحمل اسم جماعة، أيا كانت حتى ولو باسم الدين
فالدين ليس بحاجة الى مسميات وانتماءات اخرى كى تعبر عن انتمائى اليه
تحياتى
وارجو ان اكون قد استطعت توصيل وجهة نظرى
السلام عليكم
الرب الالهه
هو مجهول لكل من يستغل (بضم الياء)بأسمه
لان من يعرف الرب الاله يدرك الحق و الحكمه فلا يصير العوبه او اداة فى يد اى شخص
كم اعشق تلم المقوله
هل تعرف الله ؟ ام تعرف عن الله
عزيزتى أميرة
عندما لا يملك الشخص وعى وفكر يؤثر به ويتفاعل به مع الأخرين يحاول أن يجد طريق بديل لممارساة هذا التأثير والطريق هو ذراع مرسى , نوع من الالتفاف والخداع الذى يصبح حقيقة وطقس مرغوب فيه ومعتاد عليه مع مرور الوقت وكلما زاد عدد ممارسيه كلما زاد حضوره وتاثيره.
فكرة التدوينة والمقارنة ظريفة ومطابقة للموقف جداً .
تحياتى وتقديرى
علاء
اميرة
ده اول تعليق ليا عندك بس مش اول زياره
ولان اول دخول ليا فى عالم المدونات كانت من كام شهر بس
وانت ساعتها كنت كاتبه ان فى مدونه تحفه عند اميره البلطجيه
وبصراحه ما فهمتش حاجه بس النهارده رجعت للبوست ده وفهمت ان اميره حاجه واميره البلطجيه حاجه تانيه
مصيبه ليكون الكلام ده غلط كمان
هههههههههههه
المهم وقتها ما علقتش
بس فى جمله لسه فاكراها وعجبتنى
مش انا اللى فى الصورة لكن الكنبه )بتاعتنا)
تطويل ما كان لوش داعى
حارجع تانى عشان اعلق على البوست
وحمد لله على سلامتك
تحياتى
أنا محتاج رأيك بخصوص الموضوع ده
تجمع مدوني مصر .. حقيقة قابلة للتنفيذ أم حلم بعيد عن الواقع
انا مش فاهم حاجة
اعتراض لمجرد الاعتراض
ولا فهمت انتي متفقة مع رأي الشاب ولا مختلفة معاه ؟
انتي مع سماع الاغاني ولا بتحرميها ؟؟
مش فاهم حاجة خالص
أيوه طالما قال دراع مرسى يبقى بيتكلم صح
هههههههههههههههه
بس تعرفى إنها دى النصبايه الأساسيه إللى كتير قوى ماشيين عليها
وكنت دائماً وأنا بتناقش مع أصحابى أقلهم كله ماشى على المبدأ ده
قل الرب يتبعك الجميع
كل ما حد يتزنق يقولها
أو بمعنى أصح كل ما حد يتزنق يقلع.....يقلع عقله ويهددك بالرب وعقابه
مساء الفل والعقل
تحياتى
نسيت أقول شكراً على الكلام الظريف عن مدونتى
شكراً
عزيزتى
انتى مش عارفه ان الاسلام بيقول الدين النصحيه والنصحيه للمسلم وغير المسلم يعنى هو بس عاوز ثواب وانتى مخسرتيش حاجه بنصته بس انا مش شايف فى الصوره حاجه وحشه هى الصوره دى ولا حاجه تانى
اما سقوط صوره ياسر عرفات فلماذا الحزن عليها فاولى من سقوط الصور سقوط الشهداء والنساء والاطفال فياريت تسقط جميع الصور فى العالم العربى
نفسى اشوف صوره رئيس اوربى ولا امريكى متعلقه فى مكتب بس للاسف الرؤساء بتوعنا عاملوا معنا اللى اى رئيس فى اوروبا وامريكا معملهوش فلازم نمجدهم ونعلق صورهم
اما الجرى ورا الدين مش عيب زى الجرى ورا النسوان والفلوس والاغانى والكوره خلى الدين ياخد مكانه والناس تجرى وراه حتى هو الباقى والاولى بالجرى اما الفنانات دول مهما كانوا مش ملائكه دول بس اتحجبوا زى ملايين بس الفرق بينهم وبين غيرهم انهم مشهورين يبقا ناخد كلامهم وتصرفتهم على اد حجمهم وحجمها
اما الحديث عن الدين يشمل الحديث عن الحريه والعدل والمساواه ومليون شئ بس احنا بنتكلم عن حاجات ونسيب حاجات تانيه الدين هو الدنيا والاخره
معلش طولت عليكى
سلام
شهروزة
حضرتك كاتبة بوست في صفحة التعليقات عندي
ليــــــه ؟
الكلام ده ينفع تدوينة في حد ذاته
على رأيك
ولا كأن للحديث الشريف بقية بتقول
إعمل لدنياك كأنك تعيش أبدا
ـــــــــــــــــ
مش عارفة ليه كل مابسمع حد بيقول قال الله وقال الرسول
بافتكر الآية دي
كبر مقتاً عند الله أن تقولوا مالا تفعلون
صدق الله العظيم
ـــــــــــــــــــــ
إبقي وافيني بآخر الأخبار والنبي
حنين
برغم إني فاهمة اللي إنتي كاتباه
لكن بصراحة مش لاقية أي علاقة بينه وبين البوست
الرمد برضه ؟؟؟
ألف سلامة
سردية
أستاذ شريف
ياترى كنت كاتب إيه ؟
وياتري إتمسح ليه ؟
islam
طيب ما إحنا متفقين
أنا ما قولتش أي حاجة تدعو لهجر الدين لا سمح الله
أنا عن نفسي مؤمنة بالله وباحاول ألتزم بأوامره ونواهيه سبحانه وتعالى
لكن باشغل عقلي
مش كل واحد لابس عمة أو ماسك ميكروفون في خطبة جمعة يأثر عليّا وعلى تصرفاتي
برغم إني ساعات باسمع كلام جميل ومفيد
لكن الأيام دي بصراحة العبث أصبح كتير قوي
في عز أحداث غزة
والخناقة بين حماس وفتح
يطلع أكتر من شيخ جامع في صلاة الجمعة ويدعي
اللهم أنصر إخواننا المجاهدين في فلسطين
اللهم شتت شمل اليهود
اللهم رمّل نساءهم
ويتّم أطفالهم
والناس بتقول آمين
أكيد أنا لازم أسأل يعني إيه
يعني إيه الناس تقول آمين ؟
Blank-Socrate
فكرتني بمشهد لمحمود حميدة في فيلم باحب السيما
كل الناس بتتكلم عنك
لكن ولا حد منهم يعرفك
ـــــــ
ولمّا ربنا يقول
نحن أقرب إليه من حبل الوريد
صدق الله العظيم
ماينفعش حد بقى يقول إنه هيدلني على الطريق
ــــــــ
إنت مختفي فين ؟
بوست أكثر من رائع
فعلا..مشكله اقحام الدين في كل صغيره و كبيره من أكبر المشاكل اللي بتواجهنا في مصر و رغم كده تلاقي الفساد للركب عندنا...لازم يبقي الدين علاقه بين الفرد و ربه فقط
و محدش يحاول يفرض وصايته علي الاخر باسم الدين
تحياتي لكي
علاء
أخيراً ؟؟؟
للأسف يا صديقي
لا يعبر فقط عن الخواء وضعف المنطق والحيلة
الأمر وصل للمزايدة
المتحدثون بإسم الأديان حريصون عليها أكثر من أصحاب الرسالات أنفسهم
ملكيين أكتر من الملك يعني
والنتيجة واضحة
كلما زاد الترهيب والمنع .. زادت الرغبات وزاد الكبت وزادت الكراهية
ليس فقط كراهية الآخر بل كراهية الدنيا نفسها والحب ذاته
علاء
عدد من أقرأ لهم على المدونات يتناقص بإستمرار
من فضلك تكتب حاجة جديدة
loumi
يا أهلاً يا أهلاً
كنت باحاول أدخل عندك من زمان بس اللينك ماكنش بيشتغل
شوفتي بقى ؟؟؟
ههههههههههههه
لأ
كلامك صح
أنا حاجة وأميرة البلطجية حاجة تانية
مستنياكي ترجعي وتعلقي
وهاجيلك بقى
كده اللينك إشتغل
علاء
قريت الموضوع
وأنا الحقيقة مش موافقة
واحد من الناس
والمفروض أعمل إيه ؟؟؟
!!!!!!
husam
الكلمة الصحيحة هيّا نحتاية
مش نصباية
طالما الزبون ما إعترضش
تبقى نحتاية
لكن ما أقدرش أعمّم يا صديقي
الله يرحمه عبد الله شحاتة كان خارج المنظومة دي
ده رأيي الخاص
بس ده واحد قدّام خمسمية بنوا عمارات من ورا لقب مولانا
......
لا شكر على حقيقة يافندم
hosam
بصراحة لأ
أنا مش عارفة إن الدين النصيحة
أنا أعرف إن الدين المعاملة
ثانياً
فهمت كلامي عن إفتراضه إني مسلمة غلط
أنا مسلمة
لكن تعليقه كان فيه الجملة دي ــ مش عارف ليه بنات المسلمين مش بيراعوا ربنا في الصور اللي بيحطوها في المدونات ــ
هافترض إن عنده حق
بس همًا كل المدونين مسلمين ؟
ولا إنتمائه لجماعة زي الإخوان المسلمين نسّاه إن فيه ناس تانية على وجه الأرض وعايشين في مصر زيّه من أديان تانية
البشر فيه منهم مسلمين ويهود ومسيحيين وبوذيين وهندوس وبهائيين ولادينيين
ده على المستوى الديني والعقائدي فقط
شئنا أم أبينا .. وافقنا أو إعترضنا برضه موجودين
وعدم الإيمان بقناعة الآخر لا يلغي وجود الآخر نفسه
ولا وجود قناعاته
ولا إيه ؟
ثالثاً
بالنسبة لصورة عرفات
أنا كان قصدي المواقف مش عرفات نفسه
يعني لمّا إبراهيم عيسى يطلع يهلل ويقول ظهر الحق وزهق الباطل
وعرفات كان خاين وعميل وووو
كانت فين الشجاعة دي قبل دخول حماس لغزة
وكانت فين لمّا عرفات نفسه كان عايش
وأعتقد إن فيه وصية دينية بتقول
إذكروا محاسن موتاكم
وجهة النظر تُقال في حياة الشخص المعني بها وليس بعد أن نواريه التراب
ده كان قصدي
أخيراً
بالنسبة للفنانات
أنا مش ضد إنهم يتحجبوا ولا حاجة
لكن تتحجب وتحط 6 كيلو ماكياج على وشها وتلبس فوشيا وتطلع تمثل وتتكلم في الدين في البرامج وكمان تقول الفن رسالة ؟
لأ معهلش
أعترض وبشدة
أنا عن نفسي مابحترمش من اللي إتحجبوا غير شادية
هيّا الوحيدة اللي فهمت صح
وهيّا الوحيدة اللي ماتاجرتش بقرارها
أنا آسفة
طوّلت عليك في الرد
تحياتي ليك
اميرة حمد الله علي السلامة
عود حميد
ببتسم
.
.
اصلى عايزة اقول كلام كتير اوي..بس..هو زي مانتي قلتي كده الاضافة مش حتفيد
.
.
احنا كلنا مظلومين على فكرة..وبنظلم بعض...اللي بيلاقي حجة عشان يلغي عقله ده نتاج كل الظروف اللي احنا عيشانها..هو اتظلم مرة..او مرات...وبعدين بدوره كت خيره بيظلم بقيت خلق الله
.
.
انا مش صعبان عليا في الوضع ده كله غير
.
.
صورتنا اللي اتبهدلت بره
اتبهدلت بافعلنا لدرجة اصبح معاها الكلام عن الاسلام لازم يسبقه مقدمة زي دي
but Islam is one thing, and what Muslims are currently doing is another thing. You shouldn't judge Islam - as God intended it to be- with the reality of Muslims now. The mejority of so-called practising Muslims are not representitives of true Islam.
مقدمة غلسة
واحيانا بيبقي اسهل الانسان ميتكلمش
ده اللي تعابني اوي
allah ynawar 3aliki...
ma3lesh el keyboard msh feeha 3araby
I think it's my first time to read an article for you about ur point of view in what's going around!!
I mean most of what i read ofr u before was self imposed..
or may be it's my poor memory..
I liked ur opinion a lot
especially this
حتى لا ينتهز العقل الفرصة
ويشــــــاركنا الجلســــــــة
go on..
by the way
ezzayek :)
الكلام جميل
ومنطقى اوى
لكنه الفكره مش جديده
الدوله الثمانيه فى اوخر القرا ال 18
استخدمت نفس الفكره بجعل الوالى اسمه اسمه خليفه المسلسمين
وايضا حين اراد السيطره على منطقه الحجاز
قال انشاء سكك حديد الحجاز لخدمه الحجيج
واستخدم الفاظ والقاب لها مرود دينى ليحكم سيطرته على الدول العربيه والاسلاميه
وحتى لا يعتبره اهل البلاد مستعمر ولكن يعامل معمله الفاتح
الموضع قديم ويمكن يكون متوارث من الاجداد
تحياتى
أيام الكليه كان في تجربه إسمها
Cranectomy
و تعني حرفيا إستئصال الدماغ
و كان تتستخدم مع الفقاريات الدنيا, كالدضفادع, لإختبار تأثير الأدويه على الجسم في غياب سيطرة الدماغ
عمليه مثيره للإشمئزاز, إكتشفت مع الوقت شيوعها بين البشر
This comment has been removed by the author.
أنا مش شايف الحقيقة إن الإسلام أو اى دين عموما بيطلب مننا إن إحنا نحجب عقلنا عن التفكير ... ده حتى التفكير هو اللى وصل سيدنا إبراهيم لمعرفة الله ... بس خدى بالك إن سيدنا إبراهيم معرفوش إلا لما هو (ربنا) هداه
أنا قصدى من كل ده إن العقل موجود , بس أنا برده مقتنع جدا إن الإنسان ده كائن غلبان لأقصى درجة بالنسبة لعلم الله - و أظن إنك إنتى كمان مدركة للمعلومة دى - يعنى مش كل حاجة يا أميرة هتعرفى توصليلها بالتفكير , و إلا مكناش هنعوز ربنا فى حاجة
مخك حاجة يا أميرة و إحساسك حاجة تانية .... متحاوليش تربطى بين الإتنين
بس مش معنى كده إن يجيلك واحد يقولك انا حلمت إمبارح إن القيامة هتقوم قريب و لو منشرتيش الحلم ده لعشرة من أصحابك هتجيلك مصيبة تاخد أجلك و إنتى تصدقيه .... المواضيع نسبية
بس مش كل حاجة تقبل للتفكير يا أميرة
كل الخير لكى
أحمد السعيد
لانى اعرف ان اراءك قاطعه
ولانى اعرف ان ردودك حاده
ولانى اعرف انك لم تعترفى بانصاف الحلول
ولانى اعرف انك لا تاجلين حسم الخلافات
ولانى ارى ان الموضوع كبير
ولانى شعرت بما وراء الكلمات من افكار ومواضيع متشابكه
ولانى رايت ان هذا الموضوع يحتاج لتحديد قواعد لبناء الفروع عليها
حكم الشعب أوحكم الله
حكم الفقيه أو حكم من يختاره الشعب
انظمه الحكم كنشاط ثقافى ونظام حكم الدين كنشاط ثقافى لغير المثقفين
الحكم بمرجعية دينيه والحكم بمرجعيه شعبيه
حدود المرجعيه الدينيه وصلاحية ايقافها
اسلوب التعامل مع الاختلافات دينيه او ثقافيه
ولان المساحه محدوده
ولان طبيعه النت لا تسمح
فوجدت نفسى
مش عارف اعلق
السلام عليكم
حمدلله علي السلامه
عاش من شافك
ان شاء الله تكوني بخير
-----------
انا عايز اعلق علي تعليق ليكي
يعني هي فهمت الحجاب صح علشان مش حطت ميكب
ولا طلعت في التي في
دا علي اساس ان الفن مش رساله وعلي اساس ان الميك اب حرام ؟
ولا علي اساس ان المحجبه لازم تكون راهبه؟
ومتعملش اي حاجه حتي لو حلال ؟
تحياتي
عزيزتي اميرة
موضوعك شائك وصعب ومحتاج لكلام كتير
بس الاول
انتي بقالك فترة مش موجودة
اوعي يكون ده الختام
اتمني عودتك سريعا
sendbad
الله يسلمك
ميرسي يافندم
أميرة البلطجية
إزيك يا صديقتي
ممممممممم
كويس إنك قولتي إن الصورة إتبهدلت بأفعالنا إحنا
الأمثلة كتيرة .. والتاريخ مليان بالأفعال السيئة برغم وجود أفعال كتيرة كويسة ومشرفة
بس مش إحنا لوحدنا
تخيلي إنتي أول صورة بتيجي في دماغك لما تسمعي كلمة يهود
مع إننا كلنا عارفين إن مش كل اليهود صهاينة
بس أول صورة بتيجي في خيالنا هيّا صورة العسكري الإسرائيلي
هيّا الحكاية كده
داين تدان
وبيتهيألي إننا أول ما هنشيل التعميم السيئ اللي بنحطه على أي آخر غيرنا
يمكن صورة المسلم تتحسن شوية
من غير مايضطر يقول مقدمات
تحيات بتعتذر على التأخير في الرد
Utopian
أهلاً يا عمرو .. إزيك إنت ؟
هيّا مش أول مرة ولا حاجة .. إنت بس اللي كنت مشغول
طيب كويس
فيه إجماع على نفس الجملة
ماتختفيش تاني بقى
سلاااام
momken
مظبوط
ميرسي يافندم على الإضافة
تحياتي
Aardvark EF-111B
بيتهيألي لو كان ممكن إنك تستأذن الضفدعة
ماكانتش هتوافق
البشر بقى بيلغوا دماغم بايديهم
ولا تجادل ولا تناقش ولا تفكر ولا .. ولا .. ولا
..
أميرة
..
تحية في زيارتي الأولى لمدونتك الفريدة
سأعود وأقرأ باستفاضة
..
أحييك
Ahmad El-Saeed
أهلاً يا أحمد
أولا أنا ماربطش بين التفكير والإحساس
الإحساس أحياناً بيكون كاذب ومضلل
والدليل ( وعسى أن تكرهوا شيئً و هو خير لكم ) صدق الله العظيم
إذن اللجوء للعقل شيئ ضروري
والشورى كمان
ولما نحتار قوي قوي
صلاة الإستخارة واللإستعانة بالخالق .. هيّا أفضل العلامات للطريق الصحيح
لكن بقى شيخ الجامع يقولي إعملي
والداعية يقولي ما تعمليش
واحد تالت مربي دقنه يقولي حرام
ورابع عنده علامة صلاة يقولي واجب
وعقلي واخد أجازة مفتوحة من وظيفته الأساسية
لأ .. ماينفعش
بصراحة مش قادرة أفهم موضوع إن الإنسان غلبان دي
أمال خليفة على الأرض إزاي ؟
وبعدين نعوز ربنا دي كلمة صعبة شوية
الكلام عن الذات الإلهية لازم يبقاله صياغة مختلفة شوية
ده رأيي .. إنت حر طبعاً
معهلش يا أحمد
أنا مصرّة على رأيي
كل شيئ بيخضع للتفكير
كل شيئ
تحياتي ليك
harmless
وبما إني مالقيتش حاجة أرد عليها
فمش هاعرف أرد
أستنى شوية يعني ؟
ولا أعمل إيه ؟
mohand
وعليكم السلام يا مُهند
أنا بخير .. أتمني إنك تكون بخير إنت كمان
.....
إيه الأسئلة المحرجة دي ؟
بص يا صديقي
أنا واحدة خريجة فنون جميلة وباشتغل في الميديا
ومع ذلك .. رأيي في الفن والكلام ده صادم شوية
كمثال يعني
أنا باحب الباليه وباحترمه
لكن بأعتبر الرقص الشرقي ده إبتذال وأفعال جواري
إتصدمت .. مش كده ؟؟؟
الفن رسالة ولا لأ ؟؟؟
الفن اللي من نوعية مسرحيات شكسبير والأوبرا والموسيقى الكلاسيك والسينيما اللي بتحترم العقل
أنا باعتبره رسالة
لكن الفن اللي من نوعية المسلسلات المملة والكليبات إياها وأفلام السبكي
مافتكرش
الماكياج حرام ولا لأ ؟
أنا ماقدرش أقول على حاجة حرام ولا حلال
لكن فكرة إن أغيّر في أي شكل هو في الأساس من صنع أحسن الخالقين
مسألة تضايق شوية
طبعاً مع وجود إستثناءات في مسألة التشوهات
ودي حلها مش في مستحضرات التجميل
موضوع المحجبات والراهبات ده بقى مش موضوعي خالص
أنا كنت باتكلم عن التناقض بين الأفعال والأقوال
مش أكتر
فيه جملة لطيفة جداً ترد على أسئلتك كلها
كل شيئ .. كل شيئ
حسنه حسن ... وقبيحه قبيح
تمام ؟؟؟
يارب يكون تمام
Muhammad EL-Ashry
ميرسي يا فندم على الزيارة
وعلى التحية
أرى في كلامك شبه إشمئزاز
أوق يكون الاشمئزاز نابع من داخلي
******
فالله لا يحتاج منا مسلسلات .. و لا أغاني .. ولا قنوات
أرى بوضوح جدا علاقتي به قبل كل ذلك و آراها وسط كل هذا الزحام
ولا ألوم على شاب في أوائل العشرينات .. لإنه شد عوده في أواخر التسعينات و الألفينات
فمن يلوم عليه ؟؟
حسنا
على من نلوم أساسا.. لم أعد أدري من ألوم؟؟
فأحيانا يصعب عليّ شاب مثل هذا الذي ذكرتيه
فهو عنده إستعداد أن ينفق كل طاقته ووقت فراغه لله
ولكن ((أعتقد)) تم ختان طريقه الصحيح إلى الله.. فأصبح يسلك بايمان طريقا .. غبر ما أراده
و أراني كثيرا مغترّه بنضوجي في رؤية طريقي.. وأنا مختّنة القرار في ما أريد أن أكون وفي حيادية قراراتي
تحياتي على بوستاتك المثير للعقل.. وهو حقا قل ما يثيره
فى مقولة مش عارف بتاع مين
بس بيتهيالى ان هى بتاع ماركس
بتقول
_الدين هو افيون الشعوب_
و اللة لو اى حاكم ف الدنيا عايز يضحك ع شعبة
يطلع رجال الدين يقولوا _الدين بيقول كذا _
تقوم الناس تصدق
و هكذا
دوخنى ياليمونة
و من هنا
ومن هذا المنبر
و باعلى صوتى
_وعلى الدنيا السلنكتييييييية_
تحياتى
بوست رائع
Post a Comment
Links to this post:
Create a Link
<< Home