أميــــرة
15 April 2007
الشــــمّاعات
إهداء إلى أيمن فاروق الشهير بـ راسبوتين
في عام 1968 كانت الأمة العربية ومصر على وجه الخصوص تُعاني جُرحاً غائراً يُسمي بالهزيمة
هزيمة عسكرية فاضحة تسبّبت فيها عوامل كثيرة لا مجال للحديث عنها
في عام 1968 كانت الأمة العربية ومصر على وجه الخصوص تُعاني جُرحاً غائراً يُسمي بالهزيمة
هزيمة عسكرية فاضحة تسبّبت فيها عوامل كثيرة لا مجال للحديث عنها
في ذلك العام ، والجميع مُرتمي في أحضان اليأس والألم
قرر أحد خريجي كلية العلوم ، وكان شاباً في الثانية والعشرين من عمره ، الهجرة إلى الولايات المتحدة
تاركاً خلفه كل الإحباطات والمُعوّقات وحتى الإتهامات
ترك وطنه المهزوم يبكي مع أغنيات مثل عدّى النهار
أو يرقص مع أغنيات مثل الطشت قاللي والعتبة جزاز
هاجر الشاب الحاصل على درجة الماجيستير آنذاك من جامعة الأسكندرية إلى أمريكا ، وحصل على شهادة الدكتوراة سنة 1974 من جامعة بنسلفانيا
ثم إنتقل إلى جامعة بيركلي بولاية كليفورنيا ليصبح ضمن فريق الأبحاث بها
.......
بعد 24 عاماً من حصوله على شهادة الدكتوراة ، وبعد 24 سنة صبر وإجتهاد ودراسة
حصل على جائزة بنجامين فرانكلين عن أبحاثه في علم الكيمياء
وبعدها بعام واحد حصل على جائزة نوبل
...........
هاجر سنة 1968 يحمل رسالة الماجيستير
وعاد سنة 1999 يحمل جائزة نوبل
.........
العالِم ده من مواليد مدينة دمنهور وأخد الثانوية العامة من مدرسة في مدينة دسوق
معندوش دراع زيادة ولا عين تالتة
بيعطش وبيجوع وبيحتاج ينام زيّنا بالظبط
وبيتأثر بأحوال بلده زيّنا بالظبط
كل الموضوع إنه فهم حاجة إحنا مش فاهمنها
كل الموضوع إنه فهم حاجة إحنا مش فاهمنها
حاجة بتقول إن الحياة مش
a piece of cake
........
79 Comments:
اميره
الاصرار ثم الاصرار والصبر والمثابره واولهم و اخرهم الاخلاص
زويل لما ترك مصر مش بسبب النكسه ده راجل (راجل) عارف هو عايز ايه..هو فيه اسواء من هزيمة 67 الايام دى ولا هزيمة 67 ولكن كان فيه رجاله واصرار شباب فضل فى الخنادق 7 سنوات واعداد العده والعتاد لهدف مظلوب التحقيق والكل مجتمع على الهدف ده وفوق ده كله كان فى القلب المعنى الحقيقى لكلمة الله اكبر..زويل بره علشان بلده وناس تانيه جوه علشان بلدها برده..الهزيمة هى هزيمة الانسان لنفسه ..وتعليغ فشله على شماعة الاخرين..المشكله انا كل واحد فينا عايز الدنيا على مزاجه هو على كيف الشيشه اللى هو قاعد القهوة ليل ونهار بيشربها..
وزى ماكان فيه شباب 73 وزويل مصر لسه فيها رجاله ولكل وقت ساعة والساعة اتيه لاريب فى ذلك وقريبا جدا
أميرة
مش عارفة اذا كانت دي حالة نفسية عابرة تفاؤلية ولا احنا عمالين نصبر في بعض.. ولا احنا نقاوم عشان منمتش ....بس متهيألي احنا لازم نصبر بعض....بالنسبة للشماعات عندك مية حق....لكن....
لما تصلحي المسنجر او الجمنزر حبعثلك موسيقى تحفة..اصل الملف كبير مينفعش ابعثو بالامييل
اه قبل ما انسى رحت و قريت وعجبني لكنو مكتئب شور...وبما اني شايفة نفسي بنزل مدققتش..فهمتيني ...عارفة
سلام
اميره
يمكن لو كل واحد عرف هو عايزه ايه في الدنيا كنتي لقيتي ميت الف زويل ومليون محفوظ بس للاسف الوقت والعامل النفسيه الي الناس فيها خلتهم مش شايفين قدامهم
مبقاش حد عنده اصرار او قدره علي احتمال المصاعب واخطار الطريق الي مشيين فيه
ضيفي علي كدا ضياع الهدف والقدوه الحسنه
عموما لو كل واحد حدد هدفه ومشي ليه باصرار ومثابره وصبر كنا بقينا حاجه تانيه من زمان اوي
وبعدين زي ما كان فيه زويل بره كان فيه مليون الف واحد بيحارب في 73 وكانو ابطال ومحدش عرف عنهم حاجه
المهم يسلم مجهودك وموضوعك
تحياتي
الأستاذ حسني سليمان
أشكرك بشدة
أضفت بتعلقك الثري الكثير
الهزيمة هي هزيمة الإنسان لنفسه
........
دكتور زويل قارن بين بقاءه معيداً في جامعته وسفره إلى أمريكا
قارن بين البقاء والنواح على ما حدث وبين السفر والعودة في يوم ما بإنجاز ما
.......
يارب ياخدوا بالهم يا سيدي الفاضل
ياخدوا بالهم إن اللغات موجودة في القواميس اللي بعشرة جنيه
وإن العلم في الكتب مش في شاشات التلفزيون ولا على القهاوي
وإن الكمبيوتر للبحث والثقافة زي ما هو للشات والتدوين
وإن العمر اللي بيضيع ده عمرهم
يارب
أشكرك وتحياتي لحضرتك
نـــدى
خالص يا ندي
ده مش تفائل ولا باصبّر حد
ده تاريخ
أنا باتكلم عن أحمد زويل
o.k
هو مش مكتئب
هو محتار وبيدور
وفاهماكي طبعاً
تحياتي يا جميلة
يا أمورة والله عارفة انك بتكلمي عن زويل ..وانا شخصيا اعرف ناس مجبوش نوبل بس نجحو و هم باديين من الصفر و تحت الصفر
****
اللي بيدور و يحتار و خصوصا لو كان في سن صغيّّّّّّّّّّّّّّّّّّر لازم يكتئب يا أميرة.محطة لا مفر منها
gohayna
إيه اليأس ده ؟
بصي يا جيهان
أكيد أنا مش محتاجة قدوة علشان آكل كويس وألبس كويس
مش محتاجة هدف علشان أحافظ على صحتي
ليه هاحتاج قدوة علشان أكون إنسانة كويسة ومفيدة لغيري
مع إن فيه أكتر من 1000 قدوة
جيهان أنا عندي 32 سنة وممكن أقعد أتعلم منك حاجة
وإنتي أصغر مني بأكتر من 8 سنين
لا باقول عيب ولا مايصحش
لأن اللي هافهمه منك هافكر فيه ويمكن يفيدني
ويمكن كمان أفيد بيه غيري
الناس بقى اللي باشوفهم على القهاوي وأنا رايحة أو راجعة من شغلي ، بيعملوا إيه ؟
بيسمعوا لمين ؟
تفتكري فيه أي حاجة ممكن تتصلح بناس كده
مش مهم أعرف أنا عايزة إيه
صدقيني السؤال ده بنقوله علشان نضيّع وقت
لأني ممكن على ما أعرف أنا عايزة إيه أتعلملي لُغة ولا إتنين
أكيد هاكسب منهم حاجة
أحسن بكتير ما أحط إيدي على خدي
ولا إيه ؟
كلامي عن زويل مش معناه تقليل من دور أي حد تاني
أنا باتكلم عن فكرة الإحباط والهزيمة
وإزاي في وسط إحساس العار خرج واحد وقرر ما يستسلمش
تحياتي يا جيهان
ونورتيني
نــــدي
أنا عارفة إنك عارفة
بس كان قصدي أقولك إني مش باصبـّر حد
معاكي حق
فيه ناس كتير غيره
وده اللي غايظني أكتر
الناس دي عندها إيه زيادة ؟
o.k
يا فندم فهمتك
تحيات عظيمة لسيادتكم
بتتريقي علية يا اميرة ...حاضر لما المسنجر يتصلح
:)
لا فض فوك يا قمر : الإنجاز ثم الإنجاز ثم الإنجاز ... وساعتها يبقى لكلامنا تأثير و قيمة و يبقالنا وزن
عندنا يا اموره اكتر من زويل
البلد دي مليانه ومليانه اوي
بلدنا فيها عقول علماء وادباء وكل حاجه
زويل مش حيكون الاخير انشاء الله
مادامنا لسه عندنا امل وايمان ببلدنا اننا ممكن نخليها احسن واحسن
ونعلي من قدر البلد دي
مادام لسه متمسكين اننا مصريين
اللي حاربوا وعبروا وعملوا البدع
المصريين
اللي زرعوا وعمروا
وبرضه اللي طلعوا مشرفه وسميره موسي
والمشد
وزويل
ويعقوب
والباز
والملط
والبرادعي
والشعراوي ومحمد عبده
وكل الناس اللي بتحبيهم ومعجبه بيهم في حياتك من بلدنا
مادمنا لسه بنحبها حتشوفي كتير كده
.....
وايوه كده عايزين نشوف مصر بقه الحلوه وبلاش الدوشه والاكتئاب ده يا عسل
اه برضه بمناسبه عسل !!!! لا انتي اكيد عارفه
هههههههههه
تحياتي ليكي
الغالية اميرة
شكراًطبعاًلأهدائك البوست للعبد الفقير الى الله ايمن فاروق الشهير براسبوتين
احمد زويل زى ما قالو المدونين والناس والعالم راجل عالم مصرى لايختلف على ذكائه وعبقريته اتنين
ويمكنحظه كان احسن من حظ ناس تانية كتير
فى كتير عندهم مهارات وقدرات وميقلوش عن احمد زويل او الدكتور المشد رحمه الله الذى اغتاله الموساد الجمعة 13 يونيه عام 1980 بفندق
المرديان بباريس ةالحكاية برضو بدأت بعد حرب 67 بعد توقف الرنامج النووى المصرى وساعتها شعر الدكتور يحيى امين المشد ان مشاريعه وافكاره اتجمدت وقبل ساعتها العرض العراقى وسافر هناك
لغاية ما اغتيل على يد الموساد
انا عارف اننا لاينقصنا لارجل ولا ودان حتى
بس ينقصنا شىء واحد يا اميرة
شىء مهم اوى انت متكلمتيش عليه وميزة جميلة كانت فى صالح كل واحد صبر واتعلم واجتهد وسافر وحقق نجاحات
عارفة ايه هيا الميزة اللى اتحققت فى زمانهم وانعدمت فى زماننا
العدل
العدل
العدل
احمد زويل اتعلم واجتهد وحلم وحقق طموحه امتى سنة كام
المشد اتعلم امتى واجتهد امتى وحقق طموحه برضو امتى وسنة كام
هاتيلى حد وصل للدرجة اللى وصلولها العلماء دول وغيرهم من بعد سنة 75 مش هتلاقى ودورى وابحثى واعملى سرش
مش هتلاقى
عرفتى بقى احنا ناقصنا ايه عنهم
العدل هما كانو ف زمن غير الزمن وظروف غير الظروف
واحنا ف زمن تانى وظروف تانية واحلام كتير وطموحات اكتر وشباب زى الفل وعقولهم تنور قارتى افريقيا واسيا واوربا مجتمعين
لكن للأسف اهم عنصر مش موجود
واهم ركن نفسى مش موجود
العدل يا اميرة
واسف للتطويل
معلشى بس نسيت اسئلك ايه سبب اهدائك الموضوع ليا
معلشى ارجو التوضيح انتى عارفة بقى اخوكى فهمو بطىء عشان كده مسافرتش زى احمد زويل مع انى كنت متفوق فى مادة التربية الرياضية
وتحياتى
عجبنى أوى كلام أستاذ حسنى
الاصرار ثم الاصرار والصبر والمثابره واولهم و اخرهم الاخلاص
انا بواجة المشكلة دى حاليا
لكن بينى وبينك مش هاقول هتافات عن كلنا زويل والله أكبر
اللى بشوفه عكس كده
لكن ده مايمنعش ان مابين وقت وىخر بقابل استثناءات
أتمنى يزيدو فى العدد وأتحشر بينهم
;)
مؤسسه نوبل مينفعش تفرض على مصر ناس بعينها عشان تتفرد على المصريين
مصر مش احمد زويل ومحفوظ
اللى مش عارف الاسباب الرئيسيه اللى خلت زويل ومحفوظ ياخدو نوبل
هيا نفس الاسباب اللى خلت السادات ياخد نوبل
بس اظاهر ان احنا بننسى
احمد مستجير مخدش نوبل
مصطفى مشرفه مخدش نوبل
واللى مش عارف مين الناس دول ممكن يسال ويعرف زويل واللا
ناس كانت بتعمل ابحاث وهيا بتاكل
وهيا نايمه
محفوظ لما طلع يستلم الجايزة
اعترف ان فى اساتذه كانو يستحقو الجايزة دى
العقاد
الحكيم
طه حسين
يا جدعان
مصر مش زويل ومحفوظ
حتى لو مصر مش زويل ومحفوظ احنا فخورين بمستجير والعقاد وزويل والباز والمجهول والمعلوم منهم
يا دكتور
مهما كانت أسباب جايزة نوبل سياسية
بس الناس دى تعبت فعلا واستحقتها
واذا كان فى ناس تانية استحقتها بردو
لا يضيع الله أجر من أحس عملا
لكن فى النهاية مافتكرش أميرة كانت تقصد ده بكلامها
أميرة مابصيتش على زويل أو الباز
بصت على مصرى زيى وزيك
أصر وصًبر وثابر وأخلص
وأستحق
نــدى
وحياة ربنا ما باتريق خالص
أنا أقدر ؟
moahhhhh
bassem
يا عزيزي
اللي ربى خير مما إشترى
تقريباً هو المثل كده
منور يا باشا
مجهول
أهلاً وسهلاً
تعليقات ما بعد 2 صباحاً
صدقني يا دكتور
أنا ماكانش قصدي أتكلم عن مصر والمصريين وعظمتهم ولا حاجة من دي
أنا كان قصدي أقول
إن اللي عايز يعمل حاجة بيعملها
مهما كانت ظروف بلده ، أو ظروف أسرته ..فقر بقى ، فساد سياسي ولاّ أمراض حتى
الناس اللي حضرتك جبت سيرتهم دول ماكانوش ولاد حد مسئول ولا عندهم وسايط
عملوا نفسهم بنفسهم
وما دوروش على حجج مهما كانت قوية ومنطقية علشان يكتئبوا
هو ده اللي كنت أقصده
منورني دايماً بالروقان ده
وتحياتي ليك يا فندم
انزلي كده اسالي اي شاب عن اسم الراجل ده
حيقولك محمد تريكة
و لا هاني رمزي
او يمكن اسماعيل زويل
بقى الحياة مش ابيس اوف كيك
هههههههههههه
امال ابيس اوف اية؟
:))
ههههههههههههههههههههههههه
طبعا لازم أضحك
أصلى بينى وبينك كدة مفهمتش
يعنى إنتى بتشجعى الواد إنوا يسافر
ولا لاء
بتقوليلوا إنوا يعافر فى بلد مبتقدرش حد ولا يسافر فى بلد بتقدر
يعنى إنتى بتحبطى الواد زيادة
جايزة نوبل مرة واحدة
طب يا شيخة قوليلوا الكرة الزهبية
كاس مصر
ههههههههههههههه
بلاش دول
قوليلوا واحد بيقبض 10 تلاف جنية فى مصر
زيادة عنك فى إيه دة ؟؟
بلاش
نقول واحد دبلوم تجارة ماسك قسم التسويق فى مستشفى مفيش منها إثنين فى مصر
ومشرف على أثنين خريجين إعلام
ياستى
سافر ياله لو تعرف
وإبقى إبعتلى معاك
وعادى بقة
أودى
هل تشعرين احيانا ان هناك من يستمتع فى مخالفتك الرأى؟
بعض الردود هنا تشعرنى ان اصحابها لديهم رغبه فقط فى ان يخالفوكى
واصعب شئ
اصعب شئ
هو محاولة اقناع احد بما هو منطقى اصلا
أيمن
مبدئياً
أنا عملت إهداء ليك ، علشان ده التعليق اللي كان نفسي أكتبه عندك على البوست الأخير ليك
وياريتني كنت عملت كده
ماااعلينا
بص يا أيمن
أنا ماكنش قصدي أقارن بين شخصية زويل وأي شخصية ناجحة تانية
كل الموضوع إني عارفة إن جملة ظروف البلد وأحوال البلد والفساد اللي مالي البلد
بقت مبرر لكل حالات الإكتئاب واليأس وتتضيع الوقت على القهاوي
ومبدأ أصل مفيش فايدة بقى أساس تفكير ناس كتيرة قوي
فحبيت بس أفتكر شخصية ناجحة قررت في وسط إحباط عام إنها تعمل إنجاز ما
زويل مشي في سكة عارف إنه هيكون قدها
الموضوع مش إني أفكر أنا عايز إيه ؟
الموضوع إني أعرف أنا أقدر أعمل إيه ؟
أعمل إيه لنفسي الأول وبعدين أعمل إيه لغيري
وأعمله بأي طريقة ماتضرش حد
حتى لو كان التمن هو التعب والسهر
لكن لو فضلنا مستنين حال البلد يتصلح علشان نبتدي نعمل حاجة لروحنا
طب هنجيب السنين اللي ضاعت في الإنتظار دي تاني إزاي ؟
ده اللي كنت أقصده
على فكرة يا أيمن
أنا تعبت كتير قوي في شغلي
علشان ماكنش ليّا واسطة في أي شغل إشتغلته
ولا ليّا في تفتيح الدماغ اللي إنت عارف نوعيته
بس قدرت أعمل لنفسي واسطة من نوع مختلف
واسطة إسمها الإتقان
والثقافة
ومظهر كويس
وإكتشفت إن الواسطة دي أنجح بكتير قوي من أي سكة تانية
يارب أكون قدرت أوضح أنا كان قصدي إيه
تحياتي ليك
veterinary
أكيد أنا عارفة إن مصر مش أحمد زويل ولا محفوظ
وأكيد مش هاناقش ظروف حصول أي حد فيهم على جايزة نوبل
وأكيد ماكنش قصدي إننا نآخد السيرة الذاتية لأي حد منهم ونفصّل عليها حياتنا
أكيد
أنا كان قصدي حاجة تانية
كان قصدي
إني لمّا أقرر أكتب وظيفتي باللغة الإنجليزية
اللي هيّا المفروض إنها لغة دراستي
وتكون هيّا توقيعي في تعليقاتي عند المدونين
أبص بصة صُغيّرة قوي في القاموس
علشان أتأكد إنها مكتوبة صح
لو فهمت قصدي ده
هتفهم قصدي من البوست نفسه
بالمناسبة
أنا آسفة على تعليقي الأخير عندك
أنا إكتشفت فعلاً هوه قد إيه سخيف
وعندك حق في ردك عليّا
نوّرت
انا بقول استغلال مقومات النجاح الي عند كل واحد فينا ربنا مدينا كلنا مقومات نجاح فية حد بيستخدمها وفية ناس بتركنها علي الرف
انا متفقه معاكي في كل الي بتقوليه
مش معني كلامي اني بعرضك او مختلفه في الراي معاكي
انا بس بكلمك من وجهه نظر الناس الي قاعدين علي القهوه والناس الي ضايعه دي كلها
وكلامي كان بيعبر عن لسان حالهم
ودامش معناه اني متفقه معاهم ابدا
انت يا اميره صح ميه في الميه
بس يا ستي
نبيــذ
أخيــــراً ؟
طبعاً التعليقين بتوع حضرتك مش محتاجين رد مني
بس تسمحيلي أقولك ميرسي ؟؟
ربنا يكرمك يا نبيذ
وده يخليني أسألك سؤال قديم
العيب في الفيلم ولا إيه بالظبط ؟
منوراني
ووحشاني
Sampateek
أنا مافتكرش إنها وصلت للدرجة دي
أكيد بتتكلمي عن نسبة بسيطة
لأني ماكتبتش أسماء في البوست
ومع ذلك إنتي عرفتي أنا قصدي مين
الحياة ممكن تبقى
a piece of
أي حاجة
كل واحد وذوقه
كل واحد وإختياراته
نورتي
ody911
لا يا أودي
أنا مابقولش لحد يسافر برة
أنا قررت أجيب من الآخر
نكسة .... وجايزة نوبل
ولا إحنا في نكسة
ولا مطلوب مننا نجيب جايزة نوبل
مطلوب مننا بس على الأقل نفضل فاكرين تخصصنا اللي درسناه أربع أو خمس سنين
حتى لو مضطرين نشتغل حاجة بعيدة عن تخصصنا ده
علشان لمّا تيجي الفرصة
ماقولش يا خسارة
أنا نسيت اللي درسته
بس طبعاً كل واحد حر في حياته
يستفيد منها
يضيّعها
كل واحد حر يا فندم
منوّرني
harmless
أنا قادرة أعذر أي حد
ولو بصيت على عنوان البوست يمكن تعذرهم زيي
المؤلم بقى
مش الإختلاف مع المنطق
لكن تجاهل المنطق ذاته
نورتني يا فندم
وميرسي بجد
معلش عايز أعلق تانى يا قمر
إنتى عارفة طبعا أصولى الدمياطية !! عايز أحكيلك شوية عن التجربة الدمياطية
فى دمياط , العيل من سن تمن سنين يخلص مدرسته الصبح ,و يطلع على الورشه يقف يشتغل لحد بليل . و ده على كل المستويات و الطبقات , يعنى مفيش حد عاطل , مفيش حد عالة على حد , الكل شغال و عارف قيمة القرش و تعبان فيه , و ده إللى عندكوا بتسموه البخل الدمياطى . وعلشان الناس دى واخدة حياتها جـــد , ما فيش حد منهم بيشتكى من حاجة , أو عنده إحباط أو طول النهار و الليل عل القهوة , أو بيخططوا لمظاهرات , علشان الحقيقة ما فيش حد فاضى للفراغ العقلى ده .
إللى أنا بتكلم عنه ده , أسلوب حياه و نمط تفكير عايشين بيه الدمايطه , ولذلك , تلاقى عندهم كل حاجة ما عدا الشماعات !!
ملحوظة : دمياط طلعت ناس زى عبد الرحمن بدوى و بنت الشاطئ و مصطفى مشرفة و فاروق و أسامة الباز
السلام عليكم
كيف حالك اولا
طبعا انا اتشرف اني اعارض شخص زيك
بس لما اقدر اقنعه
مش اعارضه وانا مش فاهم حاجه اصلا
ودا بيحصل اوقات ومش بكتب علشان مش فاهم
بس انا فاهمك هنا
فاهم مقصدك من الشماعه
فاهم مقصدك من انه في وسط زمن الحرب والهزيمه سافر وراح علشان يبني نفسه
علي فكره الانسان بطبعه بيدور علي شماعات
اوقات علشان يعلق عليها اخطائه
واوقات علشان اسباب فشله
واوقات علشان سبب جروحه
الانسان بطبعه محب للعذاب وبيتلذذ بيه
مصر مليانه
انا عارف
وعلي فكره انا من الناس اللي تقريبا انتي بتنتقديهم في موضوعك ده
اوقات كتير بعلق علي شماعات
واوقات كتير بفشل وبغلط وبتخبط وبقع وبقوم بعدها بفتره
اوقات كتير بيكون عندي اكتئاب
واوقات كتير بكون مش عارف انا عايز ايه ولا اعمل ايه
انا نفسي اتغيير ونفسي ..... ونفسي
وما نيل المطالب بالتمني
ادعيلي وادعيلنا
خلاص كفايه اكتر من كده احباط
نورت يا مهند
عارف
همشي اهوه خلاص
عايزه حاجه ؟
طيب حته كيك من اللي في البوست
اي حاجه طيب
اوك
السلام عليك
مهند المصري
الباحث عن الحقيقة
اميرة
انا عارف انك مكنش قصدك تقارنى بين زويل وبين اى حد تانى ناجح
وانا كمان مقصدتش كده
انا اللى قصدته وده انا قولته بمنتهى الوضوح ان زمانهم غير زماننا وانتى قولتيها بنفسك الفساد والبطالة والخ الخ صح
انا مش بقول ان الفساد مبرر والبطالة عمرها ما كانت مبررولا قولت نقعد فى البيت نستنى الفرج ونعلق على الشماعات.
بصراحة بكل صراحة انا مش شايف اى شماعات بتقولى ان فيه فساد وبطالة ورشوة طيب قوليلى واحد شريف وابن ناس هيحارب الفساد والرشوة والبطالة ازاى؟
عشان كده انا لما كتبت البوست بتاعى كتبته وقولت فيه نتغير الاول ولو اتغيرنا كل حاجة بالتالى هتتغير خطوة خطوة مش كلام ولا شعارات ولا امثلة
اميرة
كلنا تعبنا فى شغلنا اللى وصل واللى موصلش اللى راح بالواسطة واللى راح بمجهوده
الفساد فى البلد دى حالة عامة بتطول المجتهد قبل البليد ولما نقول فساد وسرقة ونهب وسجن ومعتقلات مينفعش نقول بعديهاشماعات
وارجو انى مكونش طولت عليكى والخلاف فى الرأى لا يفسد للود قضية يا اميرة صح ولا ايه
كنت عايز اقول للأب الفنان حسنى سليمان لك منى كل التحية احسن حاجة انت قولتها فى تعليقك كلمة الله اكبر بس
اميرة تانى بقولك موضوعك جميلب وعجبنى جداً وكويس ان كل واحد فينا يقدر يوصل وجهة نظره للناس مش كلام ولا دخان شيشة وخلاص
المهم اننا فعلاً نلحق نلحق قبل الوقت ما يفوت ونقول يا ريت اللى جرى ما كان
بس بر ضو انا معرفتش رأيك فى البوست بتاعى انا تقريباً كنت بقصد نفس الفكرة وبقول اننا لازم نتغير
على العموم تحياتى ليكى يا استاذة وشكراً من تانى لاهدائك البوست لـــ 35 مليون راسبوتين
وما الحياة الا كفاح
:)
تحياتي بالكفاح وسف التراب
ازيك يا اميرة
اخبارك ايه
على فكرة انا بقالى سبع سنين فى الكليه
يعنى اكيد عارف ان الكلمه انجليزيا او كما هو متعارف عليه بين دارسى الانجليزيه الكلاسيكيه فمصر غلط
واكيد سهل جدا انى اغيرها
بس خدى بالك قبل اى حاجه ان ده توقيع
وانى عاوزه كده
انا اسف لو رديت عليكى باسلوب بايخ او كنتى افتكرتى ده عندى فى المدونه
انا بس حبيت اوضحلك مفهومى
ورايك يهمنى جدا طبعا
تحية للدكتور أحمد زويل رغم انى مش عارفة ايه علاقة دة براسبوتين لكن هأروح عنده دلوقتى على طول يمكن افهم
واحشانى ياسكر
حلو اوى يا اميرة والاجمل ان احنا نعمل حاجة
انتى عارفة انا بحس ان احنا مشكلتنا ان احنا مش عارفين نعمل ايه
وما اعظمها مشكلة!
ما تبقى دمتغك مليئة بالافكار وبرضه مش عارفة تعملى ايه
أة
أحمد زويل بلدياتى
عاش فى الاقاليم القاسية وقتها
مدينة دسوق
واهو زى ما انتوا شايفين
لكن صدقينى لو كان فضل هنا
مكانش بقا أحمد زويل
كان بقا حسنين ومحمدين
يا قاسم افندى السماوى
تحياتى
اهلا اميرة
موضوع جميل مشجع
انا من الناس اللى هدفى انسانى اجتماعى اكثر من انه علمى
اجزم انك ستوافقينى الراى بانا لو كل منا حقق اهداف ايجابيه ستكون المحصله مدينه فاضله
عزيزتي اميرة
انا معاكي في كل ما قلتي و تريدين حتي ان تقولية فالانسان موش محتاج غير انة من جواة يكون عندة ارادة و زمة و ضمير و حب علم و حب للذات " موش الانانية " و لاكن حب انة يحس بانة مميز و متفوق و دة موش عيب كل دة حلو
خلينا بقي في المهم لما وصل و جة عندنا و شرف و استقر عملنالة اية ؟؟
رجع تاني لا هي بسب بقي انهم خافوا منة انة يبقي وزير و لا بسبب انة حيكون رئيس وزارة و لا حتي رئيس مجلس ادارة النادي الاهلي
ببساطة شديدة احنا دولة مواردها محدودة لا تستطيع ان تصرف علي العلم و العلماء و ابحاثهم عزيزتي حتلاقي ميزانية الدكتور / زويل في امريكا علي ابحاثة قرب ميزانية مصر كلها
ببساطة احنا بنستورد العلم و التكنولوجيا اسهل من البحث العلمي و الصرف علية و الامثلة كثيرة
البرادعي ماهو مصري مصمم قاعدة كنيدي الامريكية للصوارخ النووية مصر و اسكندراني من عائلة محرم باشا فلتهم لسة لليوم موجودة بشارع ونجت رئيس الطاقة الذرية بكندا كلها مهندس/ قدري المنجي و دة بقي غير مجال الطب بالذات من مجدي يعقوب للوحش للخولي نماذج كلها اكتر من مشرفة و كلهم اضطروا يهاجروا لعدم امكانية الصرف عليهم
عكس الانجازات الفردية لمفكر و كاتب مثل / الراحل نجيب محفوظ فهو مكنش محتاج غير ورقة و قلم و جو يفن و يطلع الي جواة عليهم
ساعات الامكانيات بتظلم شعوب كاملة و امم موش افراد بس
تحياتي
أنا معتقدش البلد دي هتجيب حد تاني
يعني لا زويل ولا محفوظ ولا أي حد
مش تشائم بس نظرة واقعية
تحياتي
عندى اغنية حلوة اوى تعالى اسمعيها
و الله يا اميره ساعات الواحد بيحاول يعزي نفسه بهذه الامثله حتي لا يفقد الامل نهائيا
تحياتي لكي
عــادل
يا اهلاً بيك
أهوه الرف ده يا عادل اللي أنا باتكلم عليه
أنا مثلاً عندي على الرف نطق سليم مائة بالمائة للغة الإيطالية
وكم لأ بأس به من الكلمات
وبيني وبينك
مطنشة خالص
باقعد أقول لنفسي وأنا هاعمل إيه يعني بالإيطالي
.....
نورتني بزيارتك
gohayna
وأنا كمان يا دكتورة
كنت بأرد عليهم من خلالك
أنا عارفة إنك فهماني ومتفقة معايا نوعاً ما
منوراني يا ست الكل
وميرسي بجد على متابعتك
باسـم
تاني وتالت ورابع
براحتك يا باشا
هاتكلمني عن دمياط هاكلمك عن المحلة
آه
....
بص تعليقك ده مش عايز رد مني
بس عايزة أقولك إني فاكرة كلامك عن أسامة الباز
ويعني إيه الواحد يعمل لنفسه الأهمية المطلوبة
لحد ما يُصبح من المستحيل إستبداله
فاكر ؟
لماذا تغيّر مصطفى الفقي ولم يتغيّر أسامة الباز
فقط
لأنه رجل بلا بديل
ميرسي يا باسم
ومنوّرني
انا شيلت الاغنية خلاص
كنت حاطط اغنية لشعبولا
اغنية وطنية من الدرجة الاولى
بس شيلتها عشان بتصعب عليا نفسى كل ما بسمعها الراجل ده وطنى اوى اوى يا اميرة
الله يرحمه بقى
mohandat
وعليكم السلام يا مُهنـد
أنا الحمد لله تمام
يارب إنت كمان تكون كويس
إيه الكلام الكبير ده ؟
عارضني طبعاً
....
كويس إنك لقطت موضوع الشماعات
لكن
هل هتسمحلي أقولك إن حكاية الإنسان بطبعه دي هيّا كمان .. شمّاعة ؟
علشان لما ألاقي نفسي باعلق على شماعة الظروف خطأ
إتنين
تلاتة
ومفيش نتيجة
خلاص بقى
أدوّر على سبب تاني لأخطائي ، قلة خبرتي مثلاً
سوء نيتي جايز
عدم التركيز ممكن
ده رأيي
أنا مابنتقدش حد يا مُهند
حاشا لله يا صديقي
أنا نفسي بأدخل في ليلة الإكتئاب والإحباط دي زي أي حد
بس ما بطولش
علشان العمر مافيهوش بصراحة
واللي هاقدر أعمله أو أتعلمه دلوقتي
ممكن ما أقدرش عليه كمان شهرين
......
نوّرت يا مُهند
ههههههه
بجد زيارتك بتسعدني جداً
لكن .. أنا آسفة
البوست مافيهوش كيك
بس لو قولتلي في يوم على حاجة كويسة عملتها لنفسك
إنشالله حتى إنك قريت كتاب مهم
هيبقالك عندي شيكولاتة
نوّرت يا مُهند
المرة دي بجد
وتحياتي ليك
This comment has been removed by the author.
raspoutine
أيمن
بجد
لو الإهداء مضايقك هاشيله
بص يا أيمن
كتير بادخل مكان حكومي
فيه بلاوي
من أول الروتين لحد الرشوة
مروراً بقى بعدم الإنضباط وتجاهل أسبقية الوصول وفكرة الطابور التيواني ووسع لإبن فلان بيه وفلانة هانم والأمراض النفسية وعقد النقص ...إلخ
وفجأة ألاقي شاب صغير
لا طلّع كارت ولا عشرة جنيه
وواقف في الطابور زيّه زي غيره
وصل عند الموظف وخد الختم أو التوقيع وخلّص ورقه كله ومشي
فيه إيه ؟
ييجي دوري
أروح للموظف أقوله صباح الخير بإبتسامة
وكل كلامي معاه من فضلك وحضرتك
ولو عندي سؤال أسأله بأدب
برضه
أخلّص ورقي وأمشي
من غير ما أطلّع كارت ولا عشرة جنيه
فافهم إن الشاب الصغيّر ده أكيد عمل زيي
أيمن
إحنا اللي بنقول للناس على اللي إحنا عايزينه
عايز تدفع رشوة علشان تآخد دور غيرك وتمشي بسرعة ؟
ممكن
عايز تصبر شوية وتمشي صح وتفوّت على أي حد الفرصة في إنه يضايقك ؟
ممكن
عايز تُجبر الناس على إحترامك ؟
ممكن
عايز تبقى أحسن من إبن فلان بيه وفلانة هانم ؟
ممكن قوي
لو عايز
............
تقريباً كده رديت على تعليقك وعلقت على البوست بتاعك
تمام ؟؟
....
بخصوص الأغنية
كان نفسي أسمعها وما لحقتش
ومافهمتش برضه
هوه مين اللي ربنا يرحمه ؟
منوّرني يا شاهبندر التجار
مافيش فايدة برضه
http://www.6arab.net/GetRamFile/singers/13759.ram
اللينك اهو يا اميرة
بس خلى بالك وانتى بتسمعى الاغنية
دى اغنية وطنية وطنية يا عنى
الله يرؤحمك يا شعبولا يا فنان الوطن العربى
عايز اقولك على حاجة صغيرة
انا مبزعلش من اصحابى بسهولة
ما بالك وانتو اخواتى بقى يبقى ازعل
طيب وازعل من ايه
اهدائك ده فوق فوق فوق راسى
وبشكرك عليه تانى بس انا حبيت اوضحلك وجهة نظر السوق يعنى
انتى عارفة انى تاجر وبفكر بلغة السوق يعنى
على العموم
انا عمرى ما هزعل ابداً
تحياتى
شاهبندر التجار
أميرة البلطجية
لا ياشيخة
ده
last order
ولا إيه بالظبط ؟
ماشي سموّك
تحيات من غير تراب
التراب كان يوم التلات
أيمن
تعليق إستثنائي في غير دوره
بس ... علشان خاطرك
أنا مش فاهمة إنت ليه مش فاهم ليه الإهداء
ده التعليق اللي كان نفسي أكتبه عندك
بس قلت أكتبه عندي
ولو مش شايف علاقة بين تدوينتك واللي أنا كاتباه
يبقى أنا فهمت تدوينتك غلط
أنا عارفة إنك مش هتزعل
أهو ده العشم يا باشا يا فاهم في لغة السوق
أهو أنا نفسي أفهم لغة السوق دي
أنا مقصدش أزعلك خالص يا صديقي
ممكن تلاقيني غلسة شوية
بس ماقصدش أزعلك وحياة ربنا
تمام ؟
أيمن
الأغنية مش راضية تشتغل ... بس اللينك صح
أنا اللي عندي مشكلة في النت
وبرضه أنا مش فاهمة
مين اللي مااااااااات ؟
veterinary
أنا كويسة يا دكتور
ميرسي
إنت حر طبعاً
أنا بس كنت باشرح قصدي من التدوينة
لأن هوه ده بالظبط اللي أنا قصدته
ولا أكتر ولا أقل
بس كل واحد حر طبعاً
......
أنا ماحستش إن ردك بايخ
خالص
هوه بس كان تأثيره طارد شوية
وده مش معناه إني مش جاية تاني عندك
مدوّنتك لسه موجودة عندي
أنا بس مش هاعلق تاني
نوّرت
اميرة
فى موقف حصل معايا النهاردة
هبقى اكتبه دلوقتى ابقى اقريه
الحياة حلوة اوى يا اميرة
الأميره الموقره
اولا أعتذر عن تأخرى فى التلعيق ..يبدو أنى تعرضت لفترة نضوب أفكار مؤخرا
ثانيا .. يلاحظ \قاسم مشترك أعظم بين كل من ذكرتيهم و تفضل مجهول بذكرهم .. كلهم تلقوا تعليمهم الأساسى قبل عام 1956
سواء فى القاهره أو الأقاليم .. , فقبل الطغيان الناصرى و وضع برنامج تدجين العقل المصرى .. كان طالب المدرسه المصرى فى أى محافظه قادر على الأستيعاب و المناقشه و أعمال العقل .. ناهيك عن مناخ التحرر السياسى و الفكرى عموما قبل دستور1954 و طغيان عبد الناصر الذى تلى ذلك و أدى للهزيمه النكراء
و طبعا فى ظل اعمال العقل لم نر تطرف من أى نوع .. و لم نحتج أساسا لذكر كلمة الوحده الوطنيه لأنها ببساطه كانت حقيقه واقعه .. و كان جواز السفر المصرى مرحب به فى كل دول العالم
سيدتى الفاضله .. أن الأساس الذى أفرز العظماء تم نسفه بجداره بفعل ناصر أولا .. تلاه السادات الراحل حين سمح لأخلاقيات البداوه باجتياح مصر
تلاهما من قضى على الأساس بالضربه القاضيه .. و طبعا لا سبيل لخوج مزيد من العظماء ألا بأصلاح الأساس ..
أميرة
أولا أنا معجبة بآراءك جدا.. وبكل تواضع قدامك بطرحلك فكرتي
ومش عارفة أنا حبدأ في مبررات حقيقية ولاّ شماعات
الناس دول اللي فجيل أحمد زويل عاشوا في فترة مصر كانت بتقوم فيها
التعليم بيتسهّل للناس بعد ما كان حاجة متاحة لللصفوة وبس
البلد بقت ملك شعبها بعد ماكانوا مظلومين فيها
ماسكها رئيس زي عبد الناصر اللي كان مالي الجو عزة وكرامه و شموخ
وجت النكسة... وكانت أزمة رهيبة فوق التحمل
والأزمات بتعمل الرجالة.. وبتصنع عقول واعية و عندها عمق
تفتكري ماكانش فيه فقر.. ماكانش فيه معاناه؟؟؟
كان فيه
بس كان فيه قضية شاغلى بال الست العجوزة الجاهلة الطيبة اللي بتربي العيال
كانت بتحب عبد الناصر و فرحانه ببلدها و هي بتكبر و بمستقبل عيالها
كانت تقولهم البلد بتعلمكم ببلاش.. يا هناكم يا سعدكم.. يبقى لازم تطلعوا رجاله على قد المسئولية
لكن دلوقت
كل شيء متاح و أصبح عادة
واحنا.. همنا بقى الأكل و اللبس و التعليم عادة ليس إلاّ
المستقبل يعني فلوس
وبس
يا ترى كل اللي قلته ده مبررات ولاّ شماعات..
بجد مش عارفة.. بس أنا ماليانة أمل يا أميرة..
تحياتي
عارفة
احينا بقول لنفسي كدة برضه
الحياه محتاجة صبر
واكيد هنوصل
هنتعب ونلاقي قرف
بس اكيد بعدها راحة
مش في حد بيفضل طول عمره بيجري
ولا حد طول عمره بيقف
بس لازم يكون عندنا ارادة عشان نقدر نتحرك
او نقدر نكمل جري بعد ما ناخد فترة راحة
وهدنة
عارفة صدقيني هي الارادة
من غيرها
كان الانسان مات
وقتل نفسه
بس الارادة هي الحياة وهي مفتاح النجاح
اتمني ان ايمن يقدر يفهم دة كويس
وكلنا نفهم دة
بص المشكلة يا اميرة اننا بنصبر نفسنا اننا هنكون حاجة
بس عمرنا بيجري
راسبوتين
مانت لو كنت فالح في التربية الرياضية كان زمانك بقيت جنبي دلوقتي
ومالها التربية الرياضية يا عم ايمن
ماشي لما اشوفك يا ايمن
ياسمين
إنتي كمان واحشاني
لمّا هتروحي عند أيمن إحتمال ما تلاقيش أي علاقة بين تدوينته واللي أنا كاتباه
أنا الوحيدة اللي شايفة العلاقة بينهم
طمنيني عليكي
Amany
أهلاً بيكي يا أماني
أنا أعتقد إن الحل ممكن يكون في الترتيب والأولويات
يعني
دماغك فيها حاجات كتيرة عايزة تعمليها
إبدأي باللي هتعمليه لنفسك
وواحدة واحدة
لحد ما تلاقي إنك قادرة تفكري في غيرك
ودي مش أنانية على فكرة
تحياتي ليكي
وميرسي على زيارتك جداً
شــهــروزة
عارفة ؟
أن باتخيّل رد فعل الناس اللي حواليه وقتها
لما قال إنه هيسافر
يا ترى كام واحد إتهمه بالأنانية
وكام واحد إتهمه بالخيانة
وكام واحد قاله .. وكمان رايح أمريكا ؟
وطبعاً أنا باتكلم على توقيت السفر تحديداً
ويمكن لو كان سمع كلامهم كان بقى زي ما بتقولي
يبقى الحمد لله إنه سمع كلام دماغه
أكيد إنتي فاهماني
منوراني يا جميلة
Blank-Socrate
يا أهلاً بيك
موافقاك طبعاً
بس مش لدرجة المدينة الفاضلة
فيه حكمة صغيّرة بتقول
إذا إنصلح حال الإنسان إنصلح حال العالم
لو عندك 100 بني آدم منهم 60 كويسين وإيجابيين
هتكون المحصلة النهائية إيجابية
لو فيهم 45 بس كويسين هتكون النتيجة سلبية
فكر إنك تكون سبب في تغيير المحصلة النهائية
تحياتي ليك
yasser_auf
أهلاً بيك يا أستاذ ياسر
أولاً أنا معاك طبعاً في موضوع ضعف الإمكانيات وتكبيل أي رغبة في التطوّر
وتحديداً في التطوّر العلمي
لكن بما إن حضرتك ذكرت نجيب محفوظ
يبقى ممكن نتكلم شوية عن التطوّر الذاتي
اللي مش محتاج لا إمكانيات ولا مساعدة من الدولة
ولا حتى ديموقراطية أو عدل إجتماعي
هوه ده اللي أنا أقصده
ولمّا ضربت مثل بدكتور زويل ماكنش قصدي الإنجاز العلمي تحديداً
أنا قصدت المقارنة بين المناخ العام للبلد وقتها وقراره بتحقيق ذاته مهما كان التمن
وأعتقد إن تحقيق الذات حالياً مش مرتبط بالإمكانيات بقدر إرتباطه بالرغبة الحقيقية في تحقيق الذات
بناء الشخصية يا أستاذ ياسر
واللي مش لازم برضه تكون نتيجته جايزة نوبل بإختلاف مجالات الحصول عليها
لكن تكون النتيجة شخصية واعية مثقفة قادرة على إدارة حياتها الشخصية
بدون الإعتماد على آخر
سواء مادياً أو معنوياً
شخصية غير قابلة للكسر مع أول أزمة
وقادرة على إستغلال إمكانياتها الخاصة لصالحها أولاً ولصالح الغير ثانياً
الأمثلة اللي حضرتك ذكرتها على إختلاف مواقعها قدرت تحقق ده
وفيه أمثلة أكثر لسه جوه البلد
شخصيات لديها مقوّمات شديدة التميّز
تجعلها غير قابلة للإستبدال
وتمكّنها من فرض شروطها على الفساد
موجودين يا أستاذ ياسر
ومهما وصل بيهم الإحباط من اللي وصلناله من عبث
عمرهم مابينسحبوا أو بيفكروا يسيبوا البلد
لأنهم أقوى بكتير من العبث
ومن فكرة الإنسحاب
تحياتي لحضرتك
وميرسي على المشاركة
The Alien
إزيّك يا بيشوي
لأ خالص
مش موافقة
فيه زيّهم كتير
وهييجي زيّهم أكيد
الموضوع كله .. نقص أكسجين
تحياتي ليك
micheal
أهلاً يا مايكل
بس اللي أنا كاتباه ده مش تعزية
هوه له إسم تاني بصراحة
تحياتي ليك
raspoutine
أيمن
مفيش حاجة إتكتبت يا أيمن
أنا رايحة جاية
ومفيش حاجة إتكتبت
ما أنا عارفة إنها حلوة
يارب تفضل إنت كمان مقتنع إنها حلوة
تحياتي يا شاهبندر
والله ان حاولت اكتبها بس ملقيتش الحروف اللى ممكن تعبر عن اللى حاسس بيه
وخايف اكتبها كده تطلع مش زى ما انا حاسس وخايف متوصاش
المهم هكتبها قريب
وممكن مكتبهاش
بس الحياة فعلاً حلوة
lastknight
مرحباً بك يا سيدي الفاضل
أعادتني كلماتك أعواماً إلى الوراء
و_ جرجرتني _ بعيداً عن التدوينة
عُدت إلى الوراء أكثر من عشرة أعوام
حين إكتملت في ذهني الصورة الحقيقية لما حدث في يوليو 52
كنت قبلها من المدافعين المخلصين عن ذلك التجمع من الرعاع والموتورين
ولا أدخر جهداً في الهتاف لهم
يللا ما علينا
المهم
سؤال بعيد خالص عن الموضوع
تفتكر فيه أمل ولو ضعيف نسترجع شيئ ولو ضعيف برضه
مما يسمى بأخلاق القصور ؟؟؟
تفتكر ؟
تحياتي ليك يا فندم
بصي يااميراه انتى اتكمتي عن زويل كا حاله تعب لحد ماوصل
مفيش حد بينجح بالسهل
واكيد ده كان عنده المقومات الى خلته يوصل لنوبل
ياعني لوكان فضل فى مصر تفتكري انه كان هيبقى احمد زويل
الله اعلم طبعا ده مكتوب
انا كنت بتكلم مع حد من صحابي فى
موضوع السفر استغربت ان كل الى بنعرفهم عيزن يسفرو وبيخططو لكده من وهما فى اولى جامعه
ياعني حتى مبداء المحوله مبقاش موجود
والمشكله انهم كمان مش عارفين عيزين ايه
ده بالنسبه للي لسه متخرجش
الى اتخرج وسافر عنده امل انه يرجع يعمل حاجه للبلد
وده طبعا مش بيحصل
الى بيسافر بيجي زهقان من البلد بزياده
و
اكيد العيب مش فيهم لوحدهم
ياعني مثلا زويل لما جيه مصر بعد ماخد نوبل كان عايز يعمل جامعه تكنولوجيا
مشروع يطلع منه نوابغ فى مجلات مختلفه
كل الرجال الاعمال خدو الموضع بعدم اكتراث
وكانت النتيجه ان قطر خدت الفكره ونفذتها
واحنا وقفنا نتفرج ونفتخر ان صاحب الفكره هو احمد زويل
ولما جه وحاول تاني مفيش حد سمع ليه
و
المشكله بقت مشكله بلد اكتر من مشكله شباب
وصدقيني فيه كتير مطحونين علشان يعملو حاجه
ومينفعش نقارن الجيل الحالى بجيل السبعينيات
المعطيات اتغيرت
معلش طولت عليكي
تحياتي ياجميل
Hannoda
يا أهلاً بالجميلة الإسكندرانية
بصي يا هانودة إحنا متفقين نص نص
مبدئياً
عايزة أصححلك معلومة
ولو مش مصدقاني إسألي حد غيري
قبل الثورة
التعليم ماكانش للصفوة بس
التعليم كان للصفوة والأذكيـــاء
حطّي تحت الأذكياء دي مليون خط
سيبك من كلام يوسف السباعي في رُد قلبي
الغلابة كانوا بيتعلموا زيهم زي ولاد الباشوات
بس المتفوقين بس
والتعليم الإلزامي كان للجميع
وكان فيه حاجة إسمها الكُتـّاب
اللي هيّا الكتاتيب يعني
الكل بيعرف يقرا ويكتب
إلاّ اللي مالوش في العلام خالص بقى
تعالي بقى لما بعد الثورة
كل الفلاحين والعمال والخبازين والخياطين و و و
بقوا همّا نفسهم حملة المؤهلات العليا اللي معظمهم ناجح بالغش الجماعي ومعظمهم قاعد على القهوة
باقول معظمهم
أنا عن نفسي لو ماكنتش نفعت في التعليم كنت هاشتغل خيّاطة
وكنت هابقى خياطة شاطرة قوي
فاكرة المدامات الشيك اللي كانوا في أفلام زمان
لولا صدقي وسميحة توفيق والناس دي
كنت هابقى زيهم
يافرحتي بالتعليم المجاني
يافرحتي بالعدالة الإجتماعية
يافرحتي بطرد الأجانب اللي كانوا بيعلّموا الطبقات كلها
قبل الثورة يا هانودة ماكانش فيه بنت مابتعرفش تطبخ وتخيّط وتتكلم لُغات وتلعب بيانو كمان
سواء في الطبقات الراقية أو الطبقات المتوسطة
وياريت تسألي حد تاني غيري علشان تتأكدي
يا صديقتي
طغيان المادة موجود منذ زمن
منذ أن قرر الفلاح المصري أن يهجر أرضه
أرضه التي أعطته إياها الثورة كما يقولون
هجرها ورحل إلى بلاد النفط والنقود
أو إلى المدينة ليعمل حارس عقار وسمسار
وبالرغم من تلك الهجرة
حافظ على أهم قواعد الحياة الريفية
وهي إنجاب أكبر عدد ممكن من الذريّة الصالحة إن شاء الله
لا أدري تحديداً في عهد مَن مِن زعماء العزة والكرامة
لكن هذا ما حدث
جبتلك إحباط أنا عارفة
بس خللي عندك أمل برضه
لأن أنا شخصياً عندي أمل
فيه قاعدة بتقول
إن أهم خطوة في الشفاء
إن الواحد يعرف هوه عيّان بإيه
تحياتي يا جميلة
smraa alnil
إنجي
أموت وأعرف إنتي إيه اللي جابك في النكد اللي بنتكلم فيه دلوقتي
ما تخليكي في حالة الحب اللي إنتي فيها
يللا إنتي حرة
أنا مش فاهماكي يا أنووج
يعني إيه بنصبر نفسنا إننا هنكون حاجة
بس عمرنا بيجري
يعني إيه بنصبر نفسنا ؟
بنصبر نفسنا وإحنا قدّام قنوات الأغاني ؟
مفيش معلومة في الدنيا مالهاش لازمة
إمسكي كتاب في أي تخصص وإضغطي على نفسك وإقريه
إتفرجي على قنوات ثقافية وتعليمية
إتكلمي مع ناس كلامهم ياخدك لفوق مش لتحت
ساعتها العمر هيجري برضه
بس مش على الفاضي
مش كل مرة تيجي تمسكي في خناق حد
طوّلي بالك على الناس شوية
علشان أنا مش هاحوش عنك
تحياتي
moahhhhhhhh
raspoutine
التردد
التردد
مرض الجنس البشري
بُص يا عزيزي أيـّبك
لمّا تكتبها
إبعتلي رسالة بالحمام الزاجل
بس لو جيتلك على الفاضي
هابعتلك أقطاي وقطز والظاهر بيبرس
ويمكن التتار كمان
شوية تحيات حلوين كده
بقولك ايه
انا جايه امسي عليكي بس والله
عامله ايه يا قمر؟
أنا حاسأل يا أميررة
بس تفتكري لو مش ده السبب اللي خلق في مصر مثقفين و أدباء و علماء بأعداد كبيرة
أمال ايه؟؟
مش عارفة
كتير كنمت بعمل مقارنات لإني كنت بفكر زيك.. ناقصين ايه إحنا؟؟
عارفة شايفة قدامي خيوط كتيرة قوي و حاساها عاملالي شبكة
بس أوضح خيط هو التعليم واسلوبه و مبررنا ليه
بنتعلم ليه.. على رأي صديقتنا.. متغيرة شوية
بنتعلم عشان لما نخلص نقول خلصنا؟؟
بالنسبة للأمل.. فأنا معاك
أنا عرفت غلطاتي فين و عمالة أعظمها في عيني وأضخمها
عشان لازم أمسحها فحياة ولادي
ولو ماخلفتش حاتبنى عشان أنا مصرة إني أقدم للبلد ده حد يفيدها طالما أنا معرفتش أفيدها
محض روح
أهلاً بصديقتي الصغيرة
أنا عارفة إن الإحباط العام ممكن يخنق
بس خدي بالك
اللي بيتخنق هو إحنا
مش اللي بيحبطونا
هوه اللي بيسافر برة بيشتغل إيه ؟
هوه مافيش شغل في مصر ؟
لأ فيه
بس مافيش حد عايز يشتغل نجار مثلاً
برغم إنه ممكن يكون بيحب النجارة وشاطر كمان
علشان لو إتقدم لبنوتة حلوة
باباها هيقوله إنت إتجننت ؟؟
لكن برة
ممكن يشتغل في المجاري مثلاً
عادي
يا صديقتي
فيه شاب في مصر
خريج كلية علوم
أنا للأسف مش فاكرة إسمه
الشاب ده ركن الشهادة على جمب
وقرر يفتح مشروع لجمع القمامة
غالباً في مدينة تانية غير القاهرة
وأكيد عنده فريق عمل كبير
الخبر ده أنا قريته في الأهرام على فكرة
لو الشاب ده إتقدملك هتقبليه ولا هترفضيه
هوه ده السؤال
والإجابة هيّا اللي بتخلي الشباب يفكر يسافر برة
أي شغل في أي حتة في الدنيا بيجيب فلوس وبيعمل مستقبل
المهم
شغلي ده هاقدر عليه وهاكبر فيه ولا لأ
والناس هتبصلي إزاي
فهمتيني ؟؟
تحياتي ليكي
gohayna
د / جي جي
يسعد مساكي وصباحك وأيامك كُلها
تسلميلي يارب
Hannoda
يا أهلاً باللي محسساني بالذنب
بجد يا هانودة أنا آسفة
ممكن أكون عملتلك شوية لخبطة
بصي لو التعليم هوه القضية الرئيسية
هتقولي إيه عن العقاد مثلاً
الراجل ده ماستفادش من التعليم المجاني في حاجة
الراجل ده معاه إبتدائية قديمة
مفيش غيرها
لكنه من أعظم الأدباء المصريين
كتب في الدين والفلسفة والسياسة
وكتب شعر كمان
هتقولي إيه عن كل النوابغ والموهوبين اللي تألقوا قبل الثورة
وإحنا لسه عايشين على فنهم وفلسفتهم وعلمهم
......
سؤالك طبعاً مهم جداً
إحنا لازم نتعلم
بس لمّا يبقى معايا شهادة
ليسانس حقوق مثلاً
آخدها وأقعد في البيت بقى وخلاص ؟
ولا أقرا وأذاكر تاني وأتابع كل اللي يمت لتخصصي بصلة علشان أبقى قد الشهادة اللي في إيدي ؟
أو أحاول أشوف حاجة تانية ممكن أكون هافلح فيها وبرضه أذاكر وأتابع علشان أعمل لنفسي مستقبل
هيّه دي المشكلة
أنا أخدت شهادة ... أشتغل بقى
طيب عايز تشتغل إيه ؟
مش عارف
طيب هتعرف تشتغل إيه ؟
مش عارف
ماحدش عارف
وماحدش عايز يعرف
مين قالك إنك مش مفيدة للبلد ؟
مجرد إنك بتقولي كده .. ده معناه إنك بتعملي حاجة
بس مش شايفاها كفاية
غيرك بيضر البلد ومستمتع باللي بيعمله
مبسوطة بمناقشاتنا
ومبسوطة بمتابعتك
بأشكرك بجد
تحياتي يا صديقتي
الاخت العزيزة اميرة
دى الزيارة الاولى للمدونة لبجميلة دى
وشكلك كده من النوع المتفائل زى حالاتى
والبلد مليانة زويل
ملايين من الزويل
بس لو اهتمينا بيهم شوية
والله نعمل المستحيل
انا احمد مغازى
دارس علوم سياسية
ويايرت تشرفينى على مدونتى البسيطة
we can
انا هضيف مدونتك عندى
Post a Comment
Links to this post:
Create a Link
<< Home