أميــــرة
14 March 2007
عدس
علي بابا راجل طيّب
قولو ورايا يا ولاد
علي بابا راجل طيّب
علي بابا راجل طيّب
....
كُلنا نذكر هذا الفيلم "محاكمة علي بابا" للكاتب أحمد رجب
وكُلنا طبعاً نعرفُ "علي بابا" نفسه
وأعتقد أن كثيرون منّا سألوا أنفسهم نفس السؤال الذي دار حوله الفيلم
أكان السيد علي بابا رجلاً شريفاً ؟
أم كان لصّاً ؟
.....
بحسبة بسيطة
حرامي سرق حرامي وإستحلّ ما سرقَه لنفسه
وبمقارنة بسيطة
بين ما فعلَه علي بابا وما فعلَه روبن هود
نستخلص نتيجة واحدة
علي بابا كان حرامي
.....
لكن اللي مقتنع إن علي بابا راجل طيب
هو حُر
ـــــــــــــــ
لديّ إقتناع كامل بجملتي الأخيرة
أقولها بإصرار شديد
اللي مقتنع ... هو حُر
واللي مش مقتنع ... هو حُر
ــــــــــــــــــ
أجلس مع إحدى قريباتي المحجبات ، فتخبرني كم هي مُستاءة من عدم إرتدائي للحجاب حتى الآن
و "مستخسراني" في السفور
يا خسارة .. الحلو ما يكملش
وكأنه يجب عليّ قياس إكتمال ديني على مازورة الآخرين
............
عشاء صاخب يجمعني بأصدقاء قُدامى وجُدد
يحتسون البيرة والخمور
بعضهم غير منتمي دينياً والبعض الآخر مسيحي وأحدهم مسلم يستحل شرب الخمر
وأنا ... أحتسي الكوكاكولا لإمتناعي عمّا يماثل نواهي ديني
فجأة وبلا أي مقدمات أو أي إستفزاز مني
أتحول إلي "صيدةالقعدة" ... الكل يسخر والكل مُستاء
لو عايزة تقعدي معانا يبقى تشربي
مش إحنا نبتدي نِفصل وإنتي قاعدة مركّزة
دا إنتي غريبة قوي
وتنتهي جلستي
.............
في رحلة سوبرجيتية ... تجلس بجواري طفلة جميلة في حوالي الثامنة من عُمرها
أشجعها بإبتسامة ... فتبدأ في الحديث
وبعد أسئلة الأطفال الرائعة .. يأتيني السؤال الغريب
طنط .. هو حضرتك مسيحية ؟؟؟؟
بإلتفاتة بسيطة للمقعد الموازي ... ألمحُ والدتها المحجبة
فأدركُ سر السؤال
...........
مناقشات حادة حول شفرة دافنشي
رسوم الكاريكاتير الدنماركية
تصريحات بابا الفاتيكان
تصريحات وزير الثقافة
قضية طلبة الأزهر
قضية كريم عامر
فضيحة هالة سرحان
.....
الدُنيا لم تعد "مسرح كبير" كما قال شكسبير
ولا حتى "أوضة كبيرة للإنتظار" كما قال جاهين
الدُنيا تحولت إلى قاعة محكمة
من محاكم التفتيش
نتنقل داخلها بين مقاعد المتفرجين
و موقعي الإدعاء والدفاع
ونحتل في معظم الأحيان منصّة القضاء نفسها
نقضي أيامنا داخل تلك القاعة
ولانجد وقتاً
لأي شيئ آخر
..
أكرر
لا نجد وقتاً
لأي شيئ آخر
..
طبعاً
لازم يبقى عدس
73 Comments:
This comment has been removed by the author.
اميرة
جميلة اوى طريقة سردك للاحداث المختلفة فى بوست واحد وكأنك كنتى بتفكرى فيهم مرة واحدة
على بابا لسة مامتش فى دلوقتى منه كتيراوى (نواب القروض) وانا شايفه حرامى وابن ستين كلب كمان
الحجاب جميل الحجاب اوى وانا شايف ان الحجاب مش ان الست تغطى شعرها عشان حرام
الحجاب ان الراجل والست يججبو عن حياتهم ما هو حرام وسىء
اذن فالحجاب واجب على كل راجل وست
انا كمان كنت بقعد مع ناس كتير وبيتريقو عليا عشان انا كمان مكنتش بشرب دهه طبعا بعد ظهور الاسلام عندى الحمد لله من تمن سنين كده
بس دلوقتى انا مبقتش اقعد معاهم
فكرتينى بالاوبريت بتاع الليله الكبيره لما القهوجى قعد يقول
اللى هيقعد راح يشرب واللى ما يشرب راح يمشى
تحياتى لباسم
بس خلاص
بالرغم من التباعد الشكلى بين اللقطات
ولكنى رايتها فى سياق واحد
سياق اختلاف موازين الحكم على الاشياء من جهة
والتفتيش فى الضمائر والاهتمام بالمظاهر من جهة
بالمناسبه
لى سؤال نسائى احترت فيه
لماذا كلما ارادت امرأه ان تتدين او تتقرب من الله يتجه تفكيرها فورا وفقط الى الملابس؟
كلما اتاح لى الحظ ان اسمع احاديث نسائيه تدعو الى التدين اجدها كلها فى هذا النظاق
الحجاب ثم توسيع الملابس ثم الطرحه ثم الخمار ثم عدم السلام باليد على الرجال ثم تجنب الرجال ...الخ
لماذا اقتصرت طرق النساء فى التقرب من الله فى الشكليات
هل لانها لا تحملهم اى عناء؟
هل لانهم لا يدرون مئات الطرق المؤثرة فى المجتمع وفى حياة الاخرين والمتاحه للنساء ويدعو اليها الدين؟
هل لانهم اساسا يهتمون بشكلهم ومظهرهم فكان هذا هو اول ما اتجه اليه تفكيرهم؟
هل هم اسرى فكره انهم فتنه وانهم مطمع وانهم يحملون عارا منذ مولدهم الا وهو جسدهم؟
ام انا الذى لم الاحظ جيدا؟
ما رايك؟
عارفة لما قريت البوست افتكرت ايه ؟
افتكرت فيلم احمد ذكى و جميل راتب لما الطيارة كانت وقعت بيهم
و هو كان بيحاكم احمد ذكى
فكان الدفاع و النيابة و القاضى
هى كده
كل واحد ناصب نفسه فى كل المناصب
و شايف انه عنده الكفاءة لكده
ربما البعض محايد و مدرك و عارف بيقول ايه
المشكلة فى الناس اللى حافظة
بس مبيخنقنيش اد الناس اللى مديه نفسها حق الحرية
و رافضة حق اللى قدامها فى الاختلاف معاه
و ده رأى عام
بغض النظر عن المواقف اللى سردتيها
مينفعش نحط ثوابت و يالدفع يا الحبس
فعلا الناس برضه بتعمل كدة معايا .ز وانتوا مالكوا
أتحجب .. أخرج .. اقعد فى البيت ..
الدنيا فعلا بقت محكمة كبيرة
بوست حلو قوى عبارة عن مشاهد متمنتجة من الحياة
مونتاج بقى
شكرا يا أميرة لإهتمامك بى
raspoutine
أيوة يا خاضضني بالصورة بتاعتك دي
ماله علي بابا يا سيدي ؟
عملّك إيه الراجل ؟
ههههه
ماشي بس كده فيه ستين كلب هيرفعوا قضايا
والمحاكم مش فاضية زي ما إنت عارف
وجهة نظرك في الحجاب عجباني
أنا كمان شايفاه معنوي مش مادي
بس إيه ده ؟
لا تناقش ولا تجادل يا أخ أيمن
حلوة ظهور الإسلام دي
عارف ؟
ده اللي محيرني
إن أنا كمان كنت غير منتمية دينياً في وقت من الأوقات
لكن عمري ما وجهت إهانة لأي دين
ولا إستهنت بمشاعر ومعتقدات حد
ولا حتى هزار
ده اللي مخليني باستغرب
هو إحنا ماكناش مُلحدين ولا إيه ؟
......
اوبريت الليلة الكبيرة ؟
ماشي يا أيمن
مردودالك في بوست
حاضر ياسيدي
ومفيش تحيات ليّا أنا ؟
دي المدونة بتاعتي
harmless
chapeau
من النوع الغالي
وتحية حُرّة مباشرة
.......
رأيي في موضوع الحجاب مش نتيجة دماغي ومزاجي
كان نتيجة قراءة وتحليل لغة النص حسب الموقف والمُخاطَب والألفاظ المستخدمة في النصوص القرآنية الخاصة بالنساء
....
بالنسبة للستات بقى يا سيدي
فامنقدرش نعمم
أعرف متدينات كتير قوي محتشمات بأناقة من غير عبايات ولا إسدالات ولا إيشاربات
بس فعلاً
لا يبدين زينتهن إلا لبعولتهن
وده اللي أنا فاهماه ومقتنعة بيه
وفيه ناس تانية لابسة الحجاب وبتؤدي كافة الفروض الدينية وبتتقرب إلى الله بكل الطرق
لكن ده مايمنعش إن فعلاً فيه مجموعة صدقوا كلام بعض الدعاة
صوتك عورة
شعرك عورة
عطرك زنا
خروجوك معصية
كُلّك على بعضك كارثة متحركة
وطبعاً بتكون النتيجة إنها تغطي الكارثة الأول وبعدين تشوف الباقي
معذورين برضه
.......
زي مافيه ناس قالوا الحجاب فرض
فيه ناس تانية قالوا لأ
بس الناس دي مينفعش تطلع على السطح
علشان المصريين يقدروا يؤدوا فريضة الحج
إنت فاهم طبعاً
على العموم
أعتقد الكتاب ده هيعجبك
حقيقة الحجاب وحجية الحديث
للمستشار محمد سعيد العشماوي
مؤسسة روز اليوسف
.....
نورتني
جداً
جداً
جداً
ياسمين
أحبك وإنت فاهمني يا جميل
مش كده والنبي ؟؟
المشكلة إننا فضينا نفسنا
سيبنا حالنا ومحتالنا وقاعدين لمين قال ومين عاد
وبيسألوا
همّا ليه طلعوا القمر وإحنا لسه ؟
......
المواقف اللي أنا حكيتها مالهاش أي لازمة
لو كان الإنترو والفينال عملوا الواجب
على فكرة أنا غيرت الصورة
وحاسة إن الموضوع بقى أوضح
تحيات من عند الندوة لحد الأوبرا
ياسمين
عارفة عارفة
تخيلي واحدة بتتكلم معاكي وهيه
شايفة إن يوم ما ربنا يرضى عنك
تبقي زيّها
تقوليلها إيه والنبي ؟
بصي
إحنا بنصحى الصبح نصبح على بعض ونشوف فيه إيه في الرول النهاردة
هنعدم حد
هنكفّر حد
هنقيم الحد على حد
وهكذا
...
واضح يا ياسمين إن فيه سوء تفاهم أنا قريت الحكاية فعلاً
عند حد اسمه سهر الليالي تقريباً
بس مهتمة طبعاً
وجيالك حالاً
تحياتي يا فندم
حلوة الفكرة قوي
بس أحلى منها بكتييير الربط والتتابع
ده أسلوبى المفضل في الكتابه على فكرة
اه صح ؟؟
انتي رأيك كان ايه بالظبط في قضية على بابا ؟؟
انا معاكى طبعا ان على بابا كان حرامى هو اخوه - واضح ان البلد دى كان كلها حراميه -
اسلوبك تحفه يدل على انك واحده ماسكه نفسها و مفاتيحك فى ايدك - لو فاهمه التعبير ده -
مش عارف مين قال ان ( الاخرين هم الجحيم الحقيقى ) و لو هو ماكانش قال كنت قلت انا :) و بال>ات فى بلدنا احنا بنتصرف و نتكلم و نعمل كل حاجه و احنا عاملين حساب الناس هاتقول ايه و كلام الناس ايه ...!!
انا مابقاليش بره مصر فتره كبيره لكن اول حاجه لفتت نظرى ان احلى حاجه ن كل واحد يتشغل بروحه و انى اعمل اللى انا عايزه من وجهة نظرى انا مش عشان الناس هاتقول ايه - ده طبعا بعد احترام الاعتبارات الدينيه و الاخلاقيه كل حسب انتمائه -
بالنسبه لتعليق اصحابك اثناء الشرب - انا اسف بس اسمحيلى - كان ممكن من الاصل تتحاشى الوجود فى مكان زى ده و تخلى الصحوبيه فى الاماكن الى تناسبك لأنه للأسف لو واحده تانيه -مفاتيحها مش معاها :) - ممكن تتأثر بالكلام ده و تديها شرب معاهم ( 95 % من شاربى الخمر و المدخنين بدأوا بتأثير اصدقائهم عليهم بنفس الطريقه .
كلامك دخل دماغى مووت ... تحياتى و ابقى زوريينى
السلام عليكم
أنا موضوع مسلم و مسيحي ده بجد ميفرقش معايا خالص
أنا ماليش صحاب مسحيين بس يشرفني إن أصاحب مسحيين عيب يعني
و بردوا كل واحد حر في ملابسه و اللي يعمله في حياته
بس طبعا لا يتعدي لحرية الأخرين
موضوع الحجاب ده علي ما اعتقد أنه دينيا زي شرب الخمر بالظبط يعني أمر من الله زي شرب الخمر ما هو نهي من ربنا
معرفش مختلف معاكي في الموضوع ده
متزعليش مني كمان في حاجة بمناسبة أصدقائك اللي كانوا بيشربوا خمرة
في حديث عن سيدنا محمد مضمونة أن اللي بيصاحب حامل المسك بيكون رائحنه طيبة و اللي يصاحب نافخ الكير يشم من الرائحة الخبيثة مش عارف نص الحديث بالظبط بس أكيد انت عارفة الحديث
متزعليش مني
سلام
بالمناسبة
علي بابا كان حرامي
أحمد سلامة
أهلاً بالزيارة الأولى
مبسوطة إن الفكرة والأسلوب عاجبينك
وإنت كمان أسلوبك جميل جداً
أنا بصيت بسرعة بس راجعة تاني أكيد
.........
رأيي في علي بايا
رأيي في علي بابا
مش ها أقولك
ههههههه
لأ هاقولك
أنا مقتنعة إنه ماكنش راجل طيب
بس الله أعلم
جايز كان سِلو بلدهم كده
.....
نورتني والله
shower-mirror
أهلاً بيك
......
القصة فعلاً مافيهاش حد طيب
جايز أبو سريع كان طيب ؟
......
والله نفسي أمسك مفاتيحي زي ما بتقول
أعرفها الأول يا ريت
....
الجحيم هو الآخرون
دي جملة للسيد / جان بول سارتر
.....
يا راجل هو الواحد يقدر يقدر يعيش من غير كلام الناس وتوجيهاتهم ونقدهم البنّاء
الحياة عَشَم
الكل عشمان فيك تديله إحساس إنه ينفع رئيس جمهورية وإن إحنا الخسرانين لو مبقاش
.......
والله عندك حق
رأيي إن مصر فيها مقومات كتير تخليها دولة محترمة بس إحنا بنتكلم على المقومات أكتر ما بنتعامل بيها
إحنا بنتكلم أكتر من ما بنعمل أي حاجة تانية أصلاً
وكلام مش مهم وفي غير اوقاته الطبيعية
في الأشغال والمستشفيات وفي المسارح والسينيمات والندوات
حتى المكتبات الناس بطلت تروحها علشان مكتوب فيها
برجاء الهدوء
الشعب المصري كله بقى عواجيز فرح
.......
الناس اللي كانوا أصحابي كانوا مختلفين عني في الإنتماء الديني وبالتالي أنا ماكونتش بأفرض عليهم رأيي وبما إني كنت باشرب زمان فمقدرة رغبتهم في الشرب
لكن إكتشفت إن تقديري وقبولي للإختلاف ده كان من جانب واحد بس ، علشان كده أنهيت الصداقة دي
أو هي إنتهت لوحدها
......
ها صدمك وأقولك إني مدخنة لوحدي من غير تأثيرات وعارفة إنها شيئ سلبي
بس أنا مش عايزة أبطل تدخين ، طالما مابيمنعنيش أتمتع بفترة الصيام في رمضان
......
شرفتني بزيارتك
وجاية طبعاً مش عايزة كلام
تحياتي
أميرة حبيبي
انتى لخصتي الموضوع كله في سطر
الدنيا بقت أوضة محاكمة كبيرة
والكل بدل ما ينشغل بعيوبه (وما اكترها) بيبص ع الحاجات اللي هو مبيغلطاش وغيره بيغلطها ويعد يهاجمها ..قال يعني عشان يبقي بينقض الغلط..لكن في الحقيقة هو بيحاول يوهم نفسه انه احسن من غيره بالمقارنة
رغم انه ميعرفش ان الشخص التاني ده ممكن يكون افضل منه عند الله
مشكلة فعلا
ده بالنسبة لقلب الموضوع
على هامش الموضوع بقي
فكرتيني بحاجة طريفة
نفس موقف الطفلة دي انا عملتوا وانا صغيرة..مامتي محجبة وكل صحابها محجات معدا واحدة حبيبتها اوي..المهم انا برضه وانا صغيرة قلتها طنط طنط هو حضرتك مسيحية؟ قالتلي بتقولي كده ليه يا حبيبتي..قلتها اصل حضرتك مش محجبة!!
هههههه
ولغاية انهاردة بتفكرني بيها
هههه
تحياتي ليكي ع البوست الجميل ده
بس برضه يا بنت يا اميرة اتحجبي بقي عيب كده..مش عشان اميرة يعني حتبلطجي عليا وتخليني مقولكيش اتحجبي
ههههه
صباحك فل
حلو موت تشبيه الحياة بالمحكمة
ومعاكي فإن كلنا بنلعب كل اﻷدوار ف المحكمة
وأكبر دور طبعا هو دور القاضي
نفسي كل واحد وواحدة يخليه ف نفسه
ونتعلم نتعامل مع البشر من غير أي إنتماءات
ونسيبنا من السطحية اللي وصلنلها ف كل حاجة
كل مشاكلنا بقت سطحية
حتي الدين مش شايفين منه غير القشور
تحياتي
no fear
وعليكم السلام ورحمة الله
كويس إنه مابيفرقش معاك
بس خللي بالك
فيه مسلمين ومسيحين مبيبقوش في الحقيقة مسلمين ومسيحين
الموضوع كله مجرد خانة في البطاقة
وطبعاً مش هانفتح قلبهم علشان نعرف
صح ؟؟
....
متفقة معاك طبعاً
حريتي تنتهي عند حدود حرية الآخرين
تمام
.......
إختلفنا بقى
طالما مفيش حد من علماء المسلمين إختلفوا على تحريم الخمر
يبقى ما ينفعش نفتي
النهي صريح ومباشر بنص قرآني
بس برضه كل واحد حر
أما الحجاب فالناس إختلفت
إذن برضه كل واحد حر
......
بس مفيش حد له حرية تكفير حد
ربنا اللي أمر ونهى
يبقى ربنا وحده اللي يحاسب
.....
الحديث النبوي ده أنا لسه حد مفكرني بيه من أسبوع
كنت ناسياه فعلاً
لكن ده مايمنعش إني كنت ساعات بكون مبسوطة وأنا قاعدة معاهم
بس لمّا وصلوا لمنطقة خطر
خلصت
.....
أزعل منك علشان مختلف معايا ؟؟
لأ طبعاً
طالما الإختلاف ده في سياق محترم عمري ما أزعل
بالعكس أتبسط جداً
لأن لو عندي أسباب مهمة لإقتناعي برأيي ، أكيد إنت كمان عندك أسبابك
...
زيارتك بتسعدني دايماً
no fear
أدينا إتفقنا تاني يا سيدي
هههههه
.....
تحياتي
أميرة هانم
بلطجية باشا
صباحك سكر على رأي كاظم
.....
عارفة
فيه مثل شعبي زي العسل بيقول
كان على وشك يبان يا ندّاغ اللبان
يعني
لو النصيحة دي مفيدة كان بان على صاحبها الأول ، مش كده ؟؟
أنا صعب أسمع بجد نصيحة من حد
غير من بيل جيتس
هههههه
......
ممممممم
طب هيه صاحبة مامتك طلعت إيه في الآخر ؟؟
لأ بجد بصي يا أميرة
أنا مش مغطية شعري
ومش لابسة في سلسلتي غير موتيفة فرعوني
وإسمي الرباعي محايد
متقدريش تحددي منه أنا ديني إيه
ومبسوطة جداً كده
علاقتي بربنا جوّايا مش أنا اللي جوّاها
دي وجهة نظري الخاصة، ومش بأطالب حد يقتنع بيها بس على الأقل يحترمها
قشطة ؟؟
....
بتهزري طبعاً
أكيد بتهزري
هنخسر بعض علشان إيشارب ؟؟
هههه
منجم بلطجة متحرك
تحيات ذات حيثية
بيشوي
منورني
...
والله بعد الكام حدوته الأخيرة اللي حصلوا في مصر دول ..وكل الأراء اللي بأسمعها من الناس في كل المواضيع وبخبرة المتخصصين والباحثين
بقعد أضحك
أنا باشتغل مونتيرة لكن ده لايمنع إني أتكلم في السياسة والدين وعلم النفس والإقتصاد والآثار وتكنولوجيا الإتصالات
والزراعة والطب والسباكة كمان
وكل الناس التانية مابتفهمش حاجة
أنا بس اللي فاهمة
إحم
ومش مهم خالص أكون بفهم في المونتاج
......
ثانية واحدة
إنت كنت أدبي ولا علمي
وبعدين جامعة القاهرة ولا عين شمس
موبينيل ولا فودافون
وخط ولا كرت
مسلم ولا مسيحي
نباتي ولا بتاكل لحوم
أنا لازم أعرف كل التفاصيل قبل ما أقرر أعرفك أكتر ولا لأ
ههههههههههههه
...........
نورتني بجد
تحياتي وتصبيحاتي
أميرة
تحياتي عالبوست الرائع اولا
وثانيا انا من رأيي ان لا على بابا كان راجل طيب ولا روبين هود
الحرامي حرامي
وتبريرة للسرقة انة بياخد من الاغنياء ما يحتاجه الفقراء لا يضعه في خانة الملائكة و لا مستردي الحقوق
اما بالنسبة لموضوع الحجاب والخمر فانا مختلف تماما مع تعليق الاخ مع خالص احترامي لرأية
لأن الخمر يوجد فية كذا نص صريح في القرآن يجعل حرمانية الخمر امر موثوق بة
لكن الحجاب فلا يوجد فية اي نص صريح وانما نصين غير مباشرين يحتملون التأويل
و حديث ان صح فهو يجعل الحجاب بمثابة سنة وليس فرض
بالطبع لان الاحاديث لا تسن فروض انما تسن سنن
ومن رأيي ان الله عز وجل لو اراد جعل الحجاب فرض على المرأة المسلمة لأنزل فية نصاً صريحاً مباشراً و ذكرها في آيات متعددة
فزي فرض على المرأة المسلمة لهو امر عظيم وجلل لا يقل شأناً الا ينزل فية نص صريح يحدد الخطوط العريضة لمفهوم الزي الواجب على المرأة المسلمة ولا يترك الأمر لتورية تحتمل الفهم في صور متعددة وحديث يسنة سنة حسنة
تحياتي
اميرة
يمكن دى قول مرة بعلق عندك فيها و لكن سامحنى يمكن كلامى ما يعجبكيش
بالنسبة لموضوع على بابا فالمدونين ردوا عليه بما فيه الكفاية
اما موضوع الحجاب فهيكون لى واقفة معاكى فيه و اعذرنى علشان هاطول شوية
انا مقتنعة تماما ان الحجاب فرض ليه بقى هاقولك
ربنا سبحانة و تعالى قال و لا يبدين زينتهن الا لبعولتهن
لوكان شعرك مش زينة ليه بتهتمى بيه قوى و تحرصى على انه يكون فى اجمل حال و اجمل لون و اجمل فورم
و اظن الأخوة الرجال عارفين كويس ايه اللى بيشدهم للمراة من ناحية الشكل هما بقى ممكن يوضحوا ليك اكتر منى زينة المراة ايه سواء عطر او لبس او شكل
و الا بقى لو طبقنا الراى اللى بيقوا ان الحجاب مش فريضة و انه سنة يبقى بقى الىى شعرها حلو تتحجب و اللى شعرها وحش تسيبة ما هو كدة كدة ما حدش هيبصله
المقصود ان الست تكون مش ملفته علشان ما حدش يفتن بيها و الا بقى ما كنش ربنا امرنا بغض البصر ز
بالنسبة للبنت اللى سالتك انتى مسيحية و لا و قريبتك اللى بتدعوا لك بالهداية و تتحجبى زيها احب اقول لها و مين قال لك اصلا انك نموذج يحتذى به لدرجة انك عايزة الناس تكون زيك و الطفلة المتطفلة اللى فجاتك بالسؤال و دة نتيجة خلفية خاطئة عندها ان الأهل فهمومها ان المسلمات فى مجتمعنا هم المحجبات بس
احب اقولك ان انا محجبة منذ 3 سنوات فقط و الرقار دى كان بيدور فى دماغى من 10 سنين مثلا و اختة لوحى لا علشان بحب واحد قالى اتحجبى و لا علشان حد من قرايبى نصحنى بكدة و انت نفسك لو اتحجبتى فى يوم من الأيام و لقيتى نفسك مش عارفة ايه الى دفعك لتغيير رأيك فى موضوع الحجاب دة تعرفى انك اتحجبتى عن اقتناع
و بالمناسبة احب اقولك انى حريصة جدا على التجديد فى منظرى و الوان ايشارباتى و هدومى لأن بحس ان البنت لازم تكون شيك فى كل الأوقات و مش معنى انها تتحجب انها تهمل نفسها و شعرها بحجة انه ما بيبانش
دى حاجة كدة داخل الأنثى احساس بالأنوثة و الجمال سواء كنت محجبة ام لا
و على فاكرة انا ليا قرايب و اصحاب كتير مش محجبين و باعتبرهم تؤام روحى و عمرى ما فكرت اقوم سلوك واحدة فيهم او اجرحها باى كلمة لأنى فى النهاية باعتبر ان كل واحد مسؤل عن تصرفاته و سلوكة
و انا قبل ما اتحجب كنت بحس بنفس شعورك دة و باترفز جدا لما حد يقولى مش هتتحجبى بقى لدرجة انى انفصلت مرة بسبب الموضوع دة
ما هو احنا مش لازم نكون صح على طول او غلط على طول و بدل ما نفضل ندور لنفسنا على حجة فى القران علشان نبرر احنا مش محجبين ليه نحاول نوضح للناس ان دة موضوع بين الفرد و بين ربنا كون ان انا محجبة و لا لا ربنا هيحاسبنى فى الأخر انا بس مش حد تانى
مع العلم ان فه حاجات كتير ممكن نكون فاهمين تفسريها غلط و ماشيين على هذا الأساس فى حياتنا اقصد هنا ما يتعلق بالنواحى الدينية
و اغبى شيئ فى الوجود ان حد يعين نفسه الحاكم بامر الله على الناس و يقوم تصرفاتهم او يفصل بينهم علشام مسلمين او مسيحين او غيرهم
اسفة للتطويل بس كتبت كل اللى حاسيته
This comment has been removed by a blog administrator.
الصورة دى أجمد بكتير
و بتتكلم لوحدها
سلام من هنا لحد ماسورة المية
:)
ههههههههههههههه
أنا مش بضحك عليكى
أنا بضحك على الدنيا
كل كلامك صح
بغض النظر عن شكلوا أو طبيعتوا
معرفش معناهم إيه دول بس
كل إللى أعرفوا إنى كلامك مظبوط
أحنا بقينا كلنا قضاه
بنحكم على الناس من برة
وبننسى نفسنا
وحماقتنا
وعادى بقة
أودى
بوست هايل جدا منك يا أميرة
علي بابا للاسف لسه موجود منه كتيييير و مش باين اننا حنخلص من أمهاله قريبا
بالنسبه لسؤال الطفله فده امتداد لزياده الهوس الديني و الجنسي لدي غالبيه المصريين في الفترة الاخيرة و ربنا يستر من العواقب....يا جماعه الدين لازم يكون عبارة عن علاقه بين الفرد و ربه وحده..مش ممكن كل واحد يفد يطلع أحكام علي مزاجه
هاله سرحان...‘عملت عنها بوست لوحدها أما موضوع بابا الفاتيكان و كريم عامر فحتلاقي البوست الاخير ليا في سياق موضوعهم...جميل توارد الخواطر ده
تحياتي لكي
اول مرة ازورك ودى طبعا غلطة بس شكرا انك اكتشفتينى الاول وملسوطة اكتر انك كاتبة عن حاجة شغلتنى كتير وهى محاكمة الاخرين انا لسه امبارح كنت قاعدة مع امى وبنتكلم عن الناس المختلفة باى حال يعنى وبصراحة زهقتنى رحت قلتلها يا امى اذا كان ربنا خلقنا وقال الى عايز يامن بيا يامن واللى عايز يكفر يكفر وانا برزق الاتنين يبقى المفروض تأدبا مع الله نسيب عبيده زى ما هو سايبهم لاختياراتهم ولا ايه
الحصان الأسود
أهلاً وسهلاً
ميرسي يا فندم
......
رأيك في علي بابا وروبن هود
أحترمه طبعاً برغم إني مش متفقة معاك تماماً
بس وجهة نظر توضع في الإعتبار طبعاً
ــــــــــــــــــــــــــــــــــ
وتبريره للسرقة انه بياخد من الاغنياء ما يحتاجه الفقراء لا يضعه في خانة الملائكة و لا مستردي الحقوق
ـــــــــــــــــــــــــــــــــــ
مممممممم
مش عارفة ليه جملتك دي فكرتني بيوم 23 يوليو سنة 1952
وناس إسمهم الضباط الأحرار
وحاجة إسمها التأميم
وأغنية إسمها فدادين خمسة
وفيلم إسمه رد قلبي
و55 سنة عشناها تحت شعار العدالة الإجتماعية
والمحكمة التأديبية اللي هتجرجر عليها من شعري يوم السبت غالباً
أستر يارب
.......
رأيك في مسألة تحريم الخمر وفرض الحجاب أنا متفقة معاك فيه
وعندي مبررات أكتر من اللي قلتها إنت علشان الموضوع يخصني أكتر علشان كده دوّرت أكتر
بس بما إني ماكنش قصدي من البوست إني أناقش قضية الحجاب أو الخمر فا أنا هاسيب محمد
no fear
هو اللي يقرا ويرد عليك لو عايز
....
على فكرة علشان محدش يضايق خالص
حديث ضعيف أو مشكوك في صحته يعني غير موجود في الصحيحين البخاري ومسلم وحديث الحجاب تحديداً حديث آحاد يعني تمت روايته على لسان شخص واحد
والحديث كمان فيه إشارات مش ألفاظ
ومش معنى إن حد ياخد بأحاديث الآحاد يبقى غلطان
لأ .. خالص
كل واحد حُر زي ما إتفقنا
تحياتي ليك
وميرسي على الزيارة
Noha
يا أهلاً بأول تعليق
ويارب ما يكونش الأخير
كلامك لازم يعجبني
ممكن ماكونش متفقة معاكي في رأيك ، لكن في كل الأحوال كلامك هيعجبني
.......
برغم إن البوست ماكنش المقصود بيه مناقشة قضية الحجاب
لكن أنا تحت أمرك
بصي يا نهى
جايز يكون صعب إننا نمسك آية آية من القرآن الكريم وأقولك توقيت نزول الوحي بيها والظروف اللي نزلت فيها وكل المبررات اللي عندي
لكن ها أقولك جزء منها
مثلاً إن أمر الحجاب لم يذكر فيه كلمة شعورهن دي خالص
وكلمة حجاب نفسها لا تعني غطاء للرأس وأنا مش فاهمة إيه اللي خلاّها كده
من وراء حجاب يعني من ورا ساتر
والكلام ده كان لأمهات المؤمنين ، زوجات الرسول يعني نظراً لإقترانهن بالرسول وتحريم زواجهن من أحد بعده
أي أية تانية ذُكر فيها شكل الزي النسائي كانت تعديل للشكل الموجود في الوقت ده أصلاً وبرضه لم يُذكر فيها لفظ شعر أو رأس ، هتقوليلي يضربن بخمورهن ، ها أقولك ده معنا غطاء الرأس ، صح ، فعلاُ ، بس ده معناه إنه كان موجود أصلاً- للرجالة وللستات على فكرة - بس مطلوب تعديل وضعه بالنسبة للستات علشان يغطي فتحة الصدر
أمُا بقى يدنين من جلابيبهن ،فدي بقى علشان الإماء - الستات العبيد يعني - كانوا بيلبسوا قصيّر ، بحكم إنها بتجري ورا الأغنام وبترعى الصغار ووراها أعمال كتير ما ينفعش تجرجر وراها حاجة على الأرض وكمان كانوا مُباحين لأي حد معدُي يعني مش سيدها بس – خُدي بالك الأَمَة غير المحظية غير الحُرة- الحُرة والمحظية كانت ملابسهم طويلة مش إحتشام على فكرة ، ده علشان شمس الجزيرة العربية اللي ممكن تأثر على جمال الساقين وكمان تمييزاً لها عن الأَمَة ، كل ده قبل الدعوة، بعد ظهور الإسلام وتحرير العبيد ومبدأ لا فضل لعربي على أعجمي إلاّ بالتقوى وكل المساواة اللي إحنا عارفنها كان طبيعي ينزل أمر بتوحيد الزي بين الحُرة وبين اللي كانت أمة وكمان علشان الأمة المسلمة تحمي نفسها من اللي كانت بتتعرضله قبل الإسلام من إستباحة لجسدها – ذلك أدنى أن يعرفن فلا يؤذين- يعني يتعرف إنهم من المسلمات فمحدش يتعرض لهم بالأذي
تعالي بقى للأية اللي ذكرتيها ، عارفة ... في اللغة العربية - لغة القرآن – .. كلمة يبدين – إبداء يعني – لغوياً لا تستخدم مع الأمور المادية ، بتستخدم مع الأمور المعنوية فقط ، إبداء رأي ، إبداء غضب ، إبداء شك... إلخ ، أنا عن نفسي عُمري ما قريتها إبداء الساقين مثلاً أو إبداء الشنطة ، الأمور المادية بيستخدم معاها لفظ " كشف " أو " ظهور " ياريت تفتحي أي كتاب بالعربي تحت إيدك دلوقتي وشوفي كلمة إبداء وراها حاجة مادية ولاّ معنوية ؟
وده معناه إن الزينة المقصودة هنا زينة معنوية ، يعني بصراحة الدلع ، الإغراء كده يعني
وده علشان الستات الحلوة اللي كان اسمهم أصحاب الرايات الحُمر ، حاجة زي بيوت الدعارة كده ، وكانوا آخر دلع لأي حد وطبعاُ الآية نزلت لمنع الفحشاء والزنا
............
ممكن طبعاً تقوليلي .. يا سلام وإنتي عرفتي الكلام ده منين ؟؟
ها أقولك عرفته بنفس الطريقة اللي عرفت بيها أشعار عنتر وقيس وجرير وقصة هدم الكعبة في عام الفيل وقصة فداء عبد الله بن عبد المطلب وحادث شق الصدر وحليمة السعدية والحجر الأسود ....إلخ
............
مفتكرش يا نهى إن فرض زي الحجاب بالأهمية اللي ناس كتير شايفاها دلوقتي ما تنزلش فيه آية صريحة زي "كُتب عليكم الصيام" مثلاً ، بس في الآخر ها قولك حاجة ، اللي فات ده كله رأيي أنا ، مش تفنيد لرأيك ، أنا محترمة رأيك جداً جداً ......وزي ما إنتي شايفة .. أنا ما دورتش على حاجة ماتخلنيش ألبس إيشارب على شعري ، بالعكس .. أنا دورت على حاجة تخليني أعمل ده .... وما لقيتش
.......
لو كنتي وصلتي لآخر الرد أحييكي بجد
ياسميييييين
شوفتي الصورة ؟
هيّ بالظبط اللي كنت عايزاها
مقصلة وشعلتين إضاءة
علشان دُعاة التنوير من الناحيتين
اليمين واليسار
قصدك إيه بماسورة الميّة ؟
كلامك بقى مليان تلميحات شريرة
moahhhhh
ody911
ما أنا عارفة إنك مابتضحكش عليّا
تستجري ؟؟
...
كلامي مش كُله صح و مظبوط
أكيد فيه كام كلمة غلط
بس إنت حُر
بتحرجني والله
......
عجباني قوي حماقتنا
إنت اللي قلتها
أنا ماقلتش حاجة
ههههه
....
أودي
chapeau
وتحية قد ضحكتك
micheal
يا أهلاً يا أهلاً
ربنا يخليك يا فندم
.......
إسكت
مش أنا إكتشفت إنه شخصية حقيقية ؟
بس من غير حكاية إفتح يا سمسم طبعاً
أنا لسه ما عرفتش إمتى وفين بس اللي فهمته إن علي بابا شخصية حقيقية مش زي علاء الدين والناس دي
....
البنوتة الجميلة مالهاش ذنب
دي طفلة ورّوها إسطمبّا وقالولها قيسي عليها الناس
على رأيك
ربنا يستر
.....
هآجي أقرا طبعاً
بس بعد إذنك مش هاقدر أحكم عليهم
علشان أنا مشغولة
باحاكم نفسي
ومش فاضية أحاكم حد
هههههههه
.....
منورني
وأوعى تقطع الزيارة
mariam
مشرفاني بزيارتك
وطبعاً أنا اللي جيت الأول
أنا ألمح جُبران في أي حتة تلاقيني جريت عليه على طول
......
بصي
حاولي بس ماتزعليش مامتك في وسط المناقشة
بس إنتي حرة
فعلاً إحنا بقينا مستخسرين بعض في جهنم
مع إن يوم الحساب محدش هيفتكر حد
أساساً دلوقتي محدش فاكر حد
ووصايا ربنا بتتنفذ حسب الأهواء وبأغراض غريبة
يللا
ما علينا
......
نورتيني
وتيجيلي وأروحلك بقى وكده
تحيات بقيمة جبران
اميرة دى قول مرة بزور مدونتك اسلوبك جميل وسردك للاحداث شيق جدا بداية انا مش شيخ ولا واعظ انا زى ناس كتير باعترف انى بكون عاصى لله فى اوقات كتير ودى النقطه الى عايز اكلمك فيها انك متلبيسيش الحجاب دة شئ عادى معصية زيي انا كمان مبعمل معاصى كتيرة لكن المشكلة انك تكونى مش معترفة اساسا بفرضية الحجاب وانة هوا الحاجة الصح يعنى انا ساعات مبصليش لكن بكون من جوايا معترف بفرضية الصلاة وبتقصيرى وبتمنى ان يجى اليوم واترك الزنب دة اتمنى انك تكونى فهمتى قصدى صح
الأرموطي
أهلاً يافندم
مع إن دي المرة التالتة اللي أقول فيها إن البوست ده مش عن قضية الحجاب خالص
بس حاضر
.......
أنا كمان لمّا مابصليش بحس إني مقصرة وبحس بالذنب
لكن وأنا مش مغطية شعري مش حاسة بالذنب
لإني زي ما إنت بتقول مش مقتنعة إن الحجاب فريضة وده رأيي ، وأظن إني لسه عندي الحرية إني أقول رأيي طالما معنديش رغبة في التأثير على رأي حد تاني
مش كده ولاّ إيه ؟؟
لكن لو حد محتاج يسمع مني جملة زي
إن شاء الله ربنا هيهديني وأتحجب في يوم من الأيام بس إنت إدعيلي
فده مش هيحصل لأني بصراحة مابحبش أكدب .......
برغم إختلاف الآراء
أشكرك
وتحياتي
اميرة
هم هيشنقوا مين النهارده
واه على بابا ستين حرامى
و النبى يا أميرة
ما تفهميش ماسورة المية غلط
علشان انتى عارفة اننا محتاجينها
____________________
سؤال بيطرح نفسه ولامؤاخذة
ليه كل الناس اللى أول مرة يدخلوا يعلقوا عندك بيكتبوا أول بالقاف
:)
_______________________
عارفة لو العسيلى هنا و سألنى ايه أكتر حاجه بتحبيها فى الشعب المصرى الشقيق ما ليكى عليا حلفان انتى عارفة
هقوله انهم بيحبوا يظيطوا فى الزيطة و هيصة هيصة
:)
بنت يا أميرة قولى لحواش عصابة دخول الحمام مش زى خروجه بيقولوله
لو ماكنتش تبقى كربونة مننا
هنحط السيخ المحمى فى صرصور ودنه
و بما ان العصابة ديموقراطية و نزيهة
زى الانتخاباش أم شفافية كده
ورق الكربون عليهم
:)
" وش واحدة بتغمز جامد "
مووووووووووووووااااااا
sara
غالباً أنا
......
وعلي بابا طلع منها زي الشعرة من العجين والظاهر إن أنا اللي لبستها
.....
بس أنا اللي جبته لنفسي
تحياتي يا فاهمة يا صغننة
أميرة
يعنى إيه
chapeau
دى ؟؟؟؟
ياسمين
هههههه
هههههههه
هههههههههه
ـــــــــــــــــ
ههههههههههه
ها هاها ها ها ها هاهههههههههههههه
هي هي هي هي هي هي
ـــــــــــــــــــــ
ها ها ها هاهاها هاها
هي هي هي
ههههههههههه
ـــ
ها هاها
هاهاهاهاه
هي هي هي هي
ههههههههههههههههههه
ــــــــــــــــــــــــــــ
بجد ؟؟؟؟
القربون عليهم ؟؟
دي قول مرة ألاقي عصابة عندها ذوق
.....
بماذا تهمس يا سيدي الدوق ؟
أ حزينُ أنت على فراق فيليب ؟
كنت أقول أن جبهتنا قد ضعفت بعد أن أصبحنا قلائل
......
......
أكتر مشهد في السينيما المصرية والتونسية مليان حرف القاف
علشان ماتزعليش
هق هق هق
......
moahhhhhh
ody911
شايف البت القمر اللي على اليمين في المدونة بتاعتي ؟
ماسكة البرنيطة بايدها وبترفعها
.....
chapeau
يعني قبعة
يعني
أرفع القبعة إحتراماً وتقديراً لسيادتك
وده لمّا سيادتك تقول حاجة تعجبني بجد
أميرة
سعيدة انى ضحكتك
و انتىعارافنى مبحشرش حاجه فى زورى
ولا زور حبايبى:)
مووووووووووووا
يووووووووووووووو
مش في اكتر منهم
انا لسة داخلة علي مدونة واحد بيتقريق عليا
عشان القاء
يا سيتي كبري
وعلي راي المثل اعملي ودن من طين وودن من عجين
وهي جت علي دي
وحياتكي انتي
انتي لو محجبة وبتصلي وبتصومي مش هيبوكي في حالك برضه
كبري
وسلميلي علي الدعاه
اول مرة اجى هنا
بجد مدونة جميل ومتنزنة
ولا هى من هواة اصلاح العالم
ولا هى من رفقة الأخ وسطبلدوف
تحياتى
إنجي
داخلة مبوّزة في وشي أنا ليه طيب ؟؟
أنا ماااالي
ههههههههه
.....
فكرتيني بقصة جحا وإبنه والحمار
لمّا ركبوه هُمّا الاتنين
وبعدين ركبه هو لوحده
وبعدين إبنه ركب لوحده
وبعدين ماحدش فيهم ركب الحمار
وفي الآخر جحا قرر يشيل الحمار على كتفه
ويمشي
......
المهم
إنتي كويسة ؟؟
hesterua
يا أهلا بأول زيارة
يارب بس ما تكونش الأخيرة
.......
أشكرك على رأيك في المدونة
وخصوصاً
على متزنة دي
.....
مين الأخ وسطبلدوف ده ؟؟
إديني اللينك من فضلك علشان أروح اشوف
.....
شرفتني
اميرة تسمحيلى انى اختلف معاكى
انا اولا مش متدين ولا حاجه
بشرب مخدرات وبعمل اى حاجه تانيه
بس فى نقطه
لازم نعرف ان الامه لا تجتمع على باطل
يعنى لو الامه اجتمعت على ان الحجاب فريضه يبقى الحجاب فريضه
وشم معنى ان تلتين او ميه او الف
قالو ان الحججاب مش فريضه يبقى الحجاب مش فريضه او يبقى الموضوعغ مشكوك فى صحته
انا مش بقولك اتحجبى
انا بقلك ان فى حديث بيقول لرب كلمه يقولها المرء لا يلقى بها بالا تهوى به فى النار سبعين خريفا
والفرق بين الملحد واللى بيرتكب الذنوب او العاصى
ان المؤمن بيزنى وهو عارف ان الزنا ده حرام
اما الملحد فهو اللى بيحلل الزنا
لما حد بيقللى بطل اللى انتا بتعملو ده
مش هقول هبطل
بقول ان الله غفور رحيم
وخير الخطائيين التوابين
وانا بتوب
وبقول كل ابن ادم خطاء
انا اسف على التطويل
على فكرة انا كنت بعشق نيتشه وهيجل وماركس
وعلى اد ما كنت بحبهم انا عيل فى اولى كليه
على اد ما بكرهم دلوقتى
veterinary
يا أهلاً
أسمحلك طبعاً
الإختلاف معي حق مكفول لكل من هو ليس أنا
.......
أولاً
الأمة لم تجتمع على أي شيئ
المُعلَن فقط هو ما تقول
أمّا المختلفون فغير مسموح لهم بالظهور
ومش في موضوع الحجاب بس على فكرة
حاجات كتييير
وأنا مبحبش نظرية القطيع
وصدقني أنا دوّرت كتير ومالقيتش
ليه بقى أعمل حاجة أنا باعتبرها سُنة
أو إقتداء بزوجات الرسول مثلاً
وأنا مش عايزة
.....
أنا قادرة أفهم وجهة نظرك ومحترماها جداً
لكن هيه مش نفس وجهة نظري
واللي مش ناتجة عن عِند أو رغبة في الإختلاف وخلاص
لأ خالص
الموضوع كله إني لمّا قررت أكون مسلمة
مِسكت القرآن الكريم
والصحيحين
وإكتفيت
....
كلام في سرك
كلامي مع ربي بيتضمن أسئلة كتيرة
أهمّها
لماذا أُصر على أن تمر أوامره ونواهيه بقلبي ثم بعقلي قبل أن تأخذ مَسار الطاعة ؟؟
علمّاً بأني أترك كل المشاعر والأفكار والخبرات ، خارج حدود سجدتي للسيد الأعظم
.....
لم أُسقِط أحداً قط من ذاكرتي
ولم أكره أحداً
حتى من ذكرتَ من أسماء
فقط
فقدتُ مُتعة الإتفاق
......
ع الهامش
كان نفسي تعلّق على حاجة تانية
مش بس ده
تحياتي
اولا و اخيرا الدين المعاملة و ليس المظهر
مع احتفاظي برأيي و هو ان الحجاب جزء لا يتجزأ من المظهر الاسلامي
مانا حر و انتى حرة يا اميرة زي مانتى قلتى
محدش هيتحاسب للتاني
عجبتنى طريقة سردك للبوست
انا برضة مقتنع اقتناع تمام ان على كان حرامى
من حقك انك ماتلبسيش الحجاب لانها حاجة تخصك بس مش من حقك انك تقولى انه تزوير على حسب اللى فهمته من الكلام و ياريت لو انا غلطان فهمنى
كل اللى حينزل على الترابيزة تشربه جمله سمعتها كتير بس عمر ماحد وجهها ليا لانى كنت بشترى دماغى و ابعد عن السكة اللى مش مناسبه ليا
هاهاها طنط هو انت مسيحية
انا بحب العدس
sharm
أهلاً بيك
حقك محفوظ يا فندم ومحدش يقدر يتكلم
أنا بقى بتكلم عن الناس اللي بتقولك مش من حقك إنك تختلف معاهم
ده اللي كنت أقصده من البوست
......
شرفتني
ahmed_h
أهلاً بيك
أنا رجعت للبوست اللي أنا كاتباه
ورجعت لردودي على التعليقات كمان
أنا ماستخدمتش كلمة تزوير دي خالص
ولا حتى ما معناه تزوير
.......
بخصوص السكك اللي مش مناسبة
ساعات الإنسان بيمشي في سكة وبعد كام متر يكتشف إنها غلط أو مش مناسبة لحياته
وساعات قبل ما ياخد خطوة واحدة بيبقى عارف إنها غلط
كُل واحد ونصيبه
إنت بقى نصيبك كان أحسن من نصيبي
هنيالك
......
شرفتني
أحلي حاجة يااميرة إنك تعملي اللي يريحك ومن نفسك هتوصلي للصح من الغلط عجبني جدا تشبيهك بتاع المحكمة والقضاة لأن كل العالم بقوا كده
الواحد بيقيم اللي حواليه ويحاكمهم كانه هبة السماء للارض
اما في نقطة الحجاب فالاهم طبعا حجاب الروح والنفس وإنك تمنعي نفسك عن بقية الذنوب ياما شفت محجبات ومصاحبين ولاد ولابسيم لبس مبين كل جسمهم
والله القصة ماهي شعر مختفي انا شايف القصة اننا اما نحب حد بنحاول نرضيه فحتة الحجاب يارب توصليلها من حتة اني عاوزة ارضي الرب ده فهعمله حاجه طالبها لكن سواء اتحجبتي او لا فتدينك الداخلي وفي تصرفاتك يخليكي احسن من مليون منقبة مش محجبة
اسلوبك اكثر من رائع بجد
دي اول زيارة لمدونتك بس وعد مني اني هبقي ضيف مستمر عندك يارب تقبليني معجب جديد بمدونتك
تحياتي أميرة
دكتور مستكنيس
أهلاً وسهلاً بيك
أخيراً
بقالي مدة بلاقي كل اللي داخل عندي بيرد على موضوع الحجاب والكل مطنش الكلام عن موضوع المحكمة
و صفحة ال
comments
عندي إتقلبت لقاعة محاكمة ليًا
و شيّلوني قضية تزوير
هههههه
.....
أحترم رأيك جداً بخصوص حجاب الروح والنفس ثم الحجاب الظاهر في الآخر
بس برضه أنا مختلفة معاك
بس كلامك وكلام أي حد عن إن الحجاب فريضة إسلامية على عيني وعلى راسي
برغم إني مش شايفاه كده
ومش بأتهم حد بإنه مش فاهم
أنا بس بقول إنه فاهم حاجة تانية غير اللي أنا فهماها
أو
أنا فاهمة الموضوع بطريقتي
.......
د/ محمد
بجد
شرفتني ونورتني
أولا أشكر علاء السادس عشر و الذى تعرفت على مدونتك عن طريق تعليقاتك لديه
أسلوب رائع فى ابراز المأساه .. و اسمحيلى أختلف معك فى أسم الدنيا .. ليست بالظبط محكمه .. أنها منحره .. فالمحكمه يحاول من فيها الحكم رجوعا لعرف و تشريع و قانون محدد سلفا و متفق عليه.. أما مايحدث فى مصر الآن أن الكل يحاول الحكم بمرجعيته هو فقط .. و بالتالى لا يفرض حكمه فحسب .. بل يعمد لفرض التشريع الذى يراه من وجهة نظر أحاديه تماما صحيحا .. و هنا لا يكون مايحدث محاكمه .. بل تناحر .. فمجتمعنا لا يتواصل ولا يتفاهم ولا يتبادل الرأى .. مجتمعنا أتقن التناحر فقط .. لذا أعتقد أن الأسم الأنسب هو منحره .. أى مكان التناحر ..بدلا من محكمه و هى مكان الحكم بالعدل
تحياتى .. و أتمنى تشريفك لمدونتى قريبا
أميرة ربنا يخليكى يارب
هههههههههه
واللهى العظيم العلم حلو برضوا
وعادى بقة
أودى
اميرة
حبيت ارد الزيارة بما انى جنتل مان
وحبيت اقولك كل سنه وانتى طيبه وكل سنه ومامتك طيبه وربنا يخليهالك
وكنت عايز اقولك على حاجه تانيه
خلى بالك من باسم لانى حاسس انه انسان رائع وان اعجبت بيه وبيكى من اول ما عينى شافتكم
وربنا يديم المعروف
وسلميلى على باسم اوى
LASTKNIGHT
شرف عظيم جداً ليّا يا فندم
أنا بشكر أستاذ علاء في العموم والله
.....
طبعاً حضرتك جبت من الآخر
أحييك
متهيألي الصورة قالت نفس المعنى
وبالشعلتين يميناً ويساراً
عندنا 3 إختيارات
اليمين واليسار والمقصلة
ههههههه
......
مشرفني بزيارتك
ody911
يا باشا ده أقل واجب
يا ريت كنا نعرف البيت فين
كنا جيبنا شوية أي حاجة وجينا
كل سنة وانت طيب تاني
عملالك فضيحة أهو
.....
العلم نورن
طبعاً
تحياتي
أيمن
شاهبندر التجار
والنبي مش أحلى من راسبوتين ؟
ناس ذوق ذوق ذوق الصراحة
........
وإنت طيب
بس أنا لسه مبقتش أم
وأفلام لا تسألني من أنا وكلهم أولادي مابتكلش معايا لسه
بس باسم قاللي إنه هيجبلي قطة صغننة
وهقعد أربيها وأعلمها الخياطة
........
بقولك إيه بقى
هو إنت تقوله
لا ياعم جواز إيه وبتاع إيه
وهنا تقولي خللي بالك منه
هو بيشتكيلك من ورايا ولا إيه ؟
الفلكة يا جابر
ههههه
....
تحيات
قاااااااااد كده
ازيك اميرة
جميلة طريقة سردك
من كلامك انتى مع الحرية وانا ايضا لكن انا ارى انها مسئولية كبيرة ياترى احنا قدها
وكمان الحرية تكون اكثر جمالاا لما تكون لاتضر ولا تمس حرية الاخرين
تحياتى
أميرة كلماتك عميقه انسانيه
لب الموضوع هو الادانه و الاخر... بينما نلتمس الاعذار لكل أخطائنا ننصب مقصله للاخرين
انت قلت كل حاجه ..
مدونه جميله جدا و فكر حر
وداخلة عندي ومش عجبك اللي بقوله
مشكلتك ايه في اني بقول ان اللي بيتكلمو في الجنس (بيثيروا الغرائز) في مدوناتهم جزم وشباشب
دا لفظ يعني يخدش حياءك مثلا يعني والا ايه وجه اعتراضك عليه؟؟؟
اكيد هيكون اخف وطأ من مجالسة المخمورين والسكاري....
فالمرء علي دين خليله...
مش انا اللي بقول كدا والله
عموما اشكرك انك اعطيتني فرصة جميلة للتعرف علي نوع اخر من المدونات هحطه معايا في الحسبان
بس عاوز اسألك سؤال مش عاوز منك رد عليه
انتي بتحسي بفخر لما تقولي انك مش محجبة وان صحابك كلهم بيشربوا خمرة؟؟؟
عموما زي ما انتي حرة تكتبي اللي انتي عاوزاه وتلبسي اللي انتي عوزاه وتصاحبي اللي انتي عوزاه...انا كمان حر اقول اللي انا عاوزه واسمي فئات الناس واصنفها حسب فلسفتي الخاصة
علي فكرة.....ردي مش هجوم ولا حاجة
يمكن نقاش وجهات نظر بصوت عالي شوية..والاختلاف في البصل لا يفسد للشوربة طعم
اسعدني تواجدك في مدونتي الوحشة
اتمني وجودك دوما فأنا احب ان استمع الي الرأي الاخر
أميرة ألف ألف ألف شكر
شكرا يا أميرة
وربنا يخليكى يا رب
تامر
أولاً أشكرك على زيارتك
ثانياً
أنا جيت مدونتك
إترعبت شوية ومشيت
بس أسلوبك حلو والفكرة مختلفة
........
رأيك في محله
وعلى قد ماهي مسئولية
فهي كمان نعمة
بلاش نحرم حد منها طالما محدش بيأذي حد
شرفتني جداً
blank-socrate
متشكرة جداً لكلامك وتقديرك للي بقوله
ومشرفني بزيارتك دايماَ يا رب
تحياتي
الراقص مع الذئاب
لو كان تعليقي عندك ضايقك
أنا آسفة
ولو كان ده اللي فهمته من البوست
طيّب
فرصة سعيدة
ody911
يا عم لا شكر ولا حاجة
كل سنة وإنت طيب
وربنا يسعدك يارب
27
تحية
علي بابا و الأربعين حرامي
الدنيا محكمة كبيرة
أنت مش محجبة ليه؟
عايز أعرف ايه اللي سلسل الأحداث دي في عقلك؟ و يعني ايه عدس؟ هل مقصود بيه لخبطة؟ ولا دنيا مهروسة؟ و لا شوربة؟
عجبني أوي الديزاين بتاع المدونة بتاعتك
ربنا يكرمك
تحياتي من ماناساس البلد
the groom
يا أهلاً يا اهلاً
الرابط بين الأحداث دي كلها
هيه فكرة القياس على النفس
يعني
أي حد مابيفكرش زيي يبقى غلطان
يعني
أنا الصح المطلق وغيري هو الغلط المطلق
.....
متهيألي بقينا بنعمل كده كتير
من غير ما نحكّم العقل ومنطق الإختلاف بين البشر
الحكاية قالت إن علي بابا كان راجل طيّب ، يبقى علي بابا راجل طيّب
ولو عقلك قالك حاجة غير كده ماتسمعش كلامه
علشان الناس إجتمعت على إنه راجل طيّب
إنت بقى هتختلف عنهم ليه ؟؟
بتفكر ولاّ حاجة ؟؟
......
العدس بقى
بص يا سيدي
فيه مثل مصري بيقول
اللي مايعرفش يقول عدس
يعني يقول أي حاجة وخلاص
المهم مايقعدش ساكت
يعني أنا لازم أتكلم حتى لو ماكُنتش فاهمة حاجة
بس ما ينفعش أي موضوع ولاّ قضية تعدّي من غير ما أقول رأيي
عيب
.......
ميرسي على رأيك في شكل المدونة
موجود على
finalsense
حاجات حلوة كتيرة
...
شرفتني بزيارتك جداً جداً
السلام عليكم ( انا بلقي السلام اهوه مي جاي اتخانق )
انا هتكلم عن نقطة الحجاب ( يادي اتليوم اللي مش باين واحد تاني هيتكلم عن نقطة الحجاب )
خلاص خلاص مش هتكلم فيها
بالنسبه بقي للناس اللي بتقول اعمل ومتعملش وبتاع ( اسلوبي ركيك بس علشان بحب العاميه )
اعتقد اننا كنا خير امه اخرجة للناس نامر بالمعروف وننهي عن المنكر ( منكر ايه يا عم الحج انت بتتكلم عن ايه )
انا بتكلمن في ان الناس بتتديكي ارشادات ( يا سيدي انا حره هما مالهم ) يا ستي بفرض انهم خايفين عليكي وبيتمنولك الحايه الكريمه في الدنيا والجنه في الاخره ( حد قالهم اني محتاجه ارشادهم ) يا ستي ما احنا قولنا اننا خير امه للناس
نا مش حكم ولا هقولك ان الحجاب هو اللي هيبين صفتك مسلمة ولا لا بس بفرض انو سنه مع اني علي ثقة انو فرض الرسول ده بالنسبه لك ايه ؟
واحد كان معدي في الشارع مثلا ؟ ولا خير الناس اللي دعاكي للحق ( من وجهه نظري كمسلم علشان محدش يقولي انت هتخبط ) طيب مش الحبيب لحبيبه تابع ؟
طيب مش هو قال ان ديه سنة مثلا طيب مش نتبع سنته علشان نفوز بشفاعتو ( يا عم انت دخلت في موضوع حبي لرسولي انت مالك )
عموما بالنسبه لعلي بابا تخيلي اني مش شايف انو حرامي ( غريبه باين عليك انك معارض وخلاص )
لا والله بس فعلا انا شايف ان نفي النفي اثبات وبما انو كان بيسرق حرامي وهوه حرامي يبقي شريف
طولت عليكم قوي علي فكره اللي بين الاقواس دا تخيلي للردودك عليا
الا قوليلي هو انتي لما كنتي ملحده وبتقعي في مصيبه مثلا هتموتي مثلا من المرض كنتي بتقولي يا رب؟
اصل غريبه هتلجئي لمين ؟
يا تري انتي مونتيره في التلفزيون المصري ولا تبع مدينه الانتاج ولا فين بالظبط ؟
مهند المصري
مُهند
أهلاً بيك
كويس إنك قررت ما تتكلمش في الحجاب لأن البوست مش عن الحجاب وردوري على الناس اللي إتكلمت عنه فيها مايكفي
....
طيب بما إنك مقتنع إن السُنّة مش فرض
مش باتكلم على الحجاب علشان ناس كتير شايفاه فرض مش سُنة وأنا بحترم رأيهم جداً
السُنن كتيرة قوي يا مهند
وأنا بحاول أعمل اللي بقدر عليه وفاهماه وخصوصاً إن كتير من السُنن دي فيها تتطابق تام مع الأخلاقيات والقيم والمبادئ الجيدة
وده طبيعي لأن الرسول عليه الصلاة والسلام قال
إنما بُعثت لأتمم مكارم الأخلاق
تمام ؟
......
رأيك في علي بابا هو رأي ناس كتير
معنديش إعتراض يا فندم
.......
إفتراضك لردودي ، إفتراض خاطئ للأسف
لأني مابردش على حد كده
......
ممكن تسأل حد لسه مُلحد
أنا عن نفسي نسيت
.....
إممممممم
هتفرق باشتغل فين ؟؟
ولا حضرتك بتشتغل في الضرايب مثلاً
نورتني يا مهند
سلاااام
Post a Comment
Links to this post:
Create a Link
<< Home